Duyan Kadam

Pengantar :  Bamulo tulisan siDaihpoman kolamaghi baciloteh pakai “bahaso talu” dipalanta lopau dunia maya gho, mulai daghi ota minum kopi ontak jo makan lopek sogan sampai mampabasoan Obama (Presiden Amerika) untuak singgah minum kopi tapi wa’e malengoh sobuak miang nyoh. Obama sajak kociak ndo ponah minum kopi doh sobab jangek’e itam logam jadi takuik tambah itm bakolam … believe or Not,  maklum cuman ota dilopau. Nan agak manggalitik iyo tanggapan daghi Ucok Talu nan mangamuko-an “Pentas Ronggeng”  bacaito tontang judul logu ronggeng : Kaghisiak ; Taijau-ijau ; Tolak Tigo ; jo logu “Duyan Kadam”.  Nah daghi situ teh kisah bamulo

Duyan Kadam”  maghupokan sabuah judul logu ronggeng pasaman nan ocok diloguan ughang bajoged di pentas ronggeng tapi nan paliang manjadi pavorit (ughang banyak suko) sabona’e logu “Tolak Tigo”.
Mandonga logu duyan kadam apolagi kinin sadang musim duyan lo (mangalacak) dikampuang itoh,  mako takona pulo kisah lamo siDaihpoman dengan siWot,  jadi ba-nostalgia lah sobuak. Kigho2 condo iko bunyi pantun logu ro :
Duyan banamo duyan kadam, ughang pinaga mambutia-nyo
Awak manjago siang jo malam, ughang dilua mandapek-nyo.

Apo nan dimungkosuik dalam pantun logu duyan kadam ro iyo kajadian bona dalam iduik siDaihpoman, mongko caito’e : Bacaghito duyan pakaro duyan kalau dikampuang awak untuak mandapek duyan masak biaso’e baintaian jatuah di pangka duyan ro bona.  Ndo condo di tompek lain doh (misal di jawa) sadang mancimpua alias mongka jo duyan ru baghu olah dipanjek baghuntuahan sampai sokah bagai dahan’e.
Kisah nyato mandapek duyan kadam (bungo kampuang…?) nan buliah jadi olah diintai-an banyak ughang (anak mudo) di tolu 30 (tigo puluah) nan lalu ampiang samo dengan kisah “siDaihpoman mandapek jodoh”,  maklumlah nan induak bogheh (andaikpaja) daghi siDaihpoman ro sajak kociak sampai godang alias olah manjadi gadih manih wa’e ro tingga di tolu….. yoo rangtalu den takona jo rangtalu.
Ibaraik duyan masak dibatang tontu oghum baun’e sainggo mambuek ughang nan mancoliakbuah duyan didahan sampai2 maintiak bajalijia ayia liua ro dek nak ondak. Godang kamungkinan tontu banyak pulo teh nyoh anak mudo nan maintai-an siang jo malam dipangka duyan nan banamo duyan kadam. Mujua ndo dapek dighaiah – malang ndo dapek ditulak….. MOH ndo teh iyo – duyan kadam ro jatuah tapalantiang ka polak (pelukan) siDaihpoman nan tingga dilua (dighantau). Jadi montunlah malalui tulisan nan sacepeng gho : siDaihpoman minto mo’oh kabokeh dunsanak nan tingga dikampuang sangkek itu, manolah tau soto pulo maintai duyan kadam jatuah badobuak ka tanah. Ba’a bonalah  ndodapek di awak doh, yang banamo jodoh  Tuhan punyo kuaso tingga di awak manjalani.
Jujur, bacaito duyan pakaro duyan memang banyak duyan nan lomak dikampuang itoh nen (tolu), mulai daghi “duyan sikunik” sampai ka “duyan cingkuak” di paroman, nan “duyan toba kulik” lai juo. Salain itu nan paliang lomak ateh sado namo’e “duyan mancimpua”, lomak dimakan sudah dikubak apolagi di gulai jo di sonok, cuman sasudah makan duyan mancimpua ro kok kalua kontuik balopuik mako baun’e ndo tangguang busuak ‘e doh, iyo ghosai-an lah dek iduang sunsughang…….namo’e  “Kontuik Duyan Mancimpua”.

Kisah balanjuik, buah duyan kadam ro kinin olah baghubah jadi asam duyan disamba pulo jo limbek basunguik,  kok lomak’e ditanyo-an atau kadisobuik hanyo siDaihpoman sughang jolah nan tau. Ba’a mangko siDaihpoman mangecek-an duyan kadam ro sabona lomak sobab mangko duyan banamo “KADAM”  =  “Ka Awak iDAMan” dengan kato lain di AMA-an ughang banyak.
Montunlah sanak, daghi bijo duyan kadam nan sabuah tanyato sasudah dipupuak dipaliagho siDaihpoman dan baghokaik jo ridho Allah samato olah tumbuah subur sampai babuah bajangka (baputiak) pulo, Alhamdulillah kinin olah lai 3 (tigo) buah nan boneh tapi olun masak lai. Mudah2an buah duyan kadam ro bisa masak dibatang, oghum maghebak komalah juo tapi bamintak do’a ka tuhan nan duyan ro ijang sampai baulek apolagi konai cekong dek tupai, sobab tontu lah kabanyak pulo nan maintai di pangka duyan ….. sia nan baghasoki malah isuak

Koba baghaliah anyo lai sungguah baghaliah disinen juo. Tasangkuik judul logu ronggeng “Tolak Tigo” nan bacaghito tontang kisah ughang dimabuak jando (mabuk janda ni ye…) dek ulah bacoghai sampai (3 (tigo) kali, mangko’e “tido teh ka mabuak” bontuak caciang kapanehan atau bontuak kapogheh konai tubo. Sadangkan baniak nak bapulangan baliak (rujuk) ndo buliah lai sobab talaghang di agamo.
Dalam iduik baghumah tanggo tontu lai diantagho kitoh atau dunsanak nan lain tajadi silang sangketo, indo bakasasuai-an antagho laki jo bini, ontah dek masalah anak, ekonomi atau masalah “kesetiaan” yang buliah jadi salah sughang sosek batindak nan istilah ughang kampuang kitoh “selingkuh” nyehe alias baulah.  Tolak Tigo namo’e, kok dapek pintak jo pinto ka nan sughang (Allah Swt) ….. jang ponah sampai tajadi kabokeh kitoh basamo (laki-padusi), sobab ughang nan mabuak tolak tigo ro iyo bona sansai nyanyuak manghano. Sungguah pun montun bagi dunsanak nan olah talanjur bacoghai sampai tigo kali (tolak tigo) usahlah ghusuah bona, sobab masih lai jalan kalua (solusi) supayo bisa basatu baliak mandayuang bahtera mahligai rumahtanggo basamo pasangan tacinto.
Samo tau lah kitoh, sasudah tolak tigo diharamkan Allah untuak ghujuak bapulangan baliak tapi bisa manjadi “halal” dibuliahkan kalau saandai’e pihak laki-laki atau padusi olah nikah pulo sasudah itu dengan nan lain kamudian bacoghai pulo.Jadi dunsanak, kok iyo mabuak bona ka jando tolak tigo ro ……. cubolah mintak tolong ka kawan atau ughang nan bisa dipicayo supayo omuah manikah sabonta (ijang lamo bona) jo jando sanak ro sasudah itu disughuah bacoghai baliak, istilah’e baupah-an.
“Tolak Tigo Baupah-an” sapanjang nan ponah didonga nampak’e ocok juo dilakoni ughang kampuang itoh dan mungkin pulo tajadi ditompek lain. Cuman nan bedo tanyato pasangan nan diupah ro sasudah nikah wa’e bakamau-an (maghaso cocok) pulo baduo kadughang sainggo indo omuah disughuah bacoghai. Kamonga awak, kasudahan’e pitih abih nan awak gigik jaghi alias mangaghopu, ilia mudiak kokin kami ndo tontu adok. Daghipado maghando togang sampai dunia kiamaik – lobiah elok caghi gonti jo nan lain, kumbang ndo sikua, bungo banyak lo nan kombang.

Sakitulah dulu sanak, dipapanjang caito beko apolagi sampai mambukak aik ughang bagai badoso godang lo awak.

Wassalam, siDaihpoman

One Response

  1. acmal Reply

Reply