Paghosaian Iduik Dikampuang

Ontah lah sanak dighantau, koma nasib kadikaduan ontah ka sia pulo ka batenggang.

Pokan ghuba’a kinin sabona poniang utak mamikia-an pitih balanjo induak bogheh (umak paja) poi kapasa. Ponga’an teh, moh nan sapokan gho aghi ujan bakapanjangan tiok aghi sainggo sakali eneng miang nyoh dapek poi manakiak gotah jo mangumpua gotah boku. Supayo maha sobuak tajua gotah ro sadio’e dipelok gotah latex tapi cuko ndo lai, lobiah’e bakughang lo dek’e gotah duo sayak untuak nan punyo panggiliang gotah, jadi’e tapaso gotah ojol jo lai (bontuak  banta) nan babokuan pakai ayia noneh mudo. Kok dijua gotah ro pampaliang cuman dapek pamboli nyak goreng, gaghan jo tukai balanak.

Aghok dapek manjua gulo onau agak 2 batang panambah pitih balanjo dapua moh aghi salasa potang wakotu pulang mambangkik nigho disosok dokek polak pua di duyan utan tagaliciak lo sidaihpoman dipangka tang cubodak sampai tajilapak, nan mato tabiloliak dek ulah panggua tahonyak. Mujua ndo dapek dighaiah kok malang ndo lo dapek ditulak, jadi’e nigho nan tasandang di bahu duo sighangkiak pocah taompeh sampai ayia nigho tatuntuang tabayak sado alahan’e ka tanah.

Mughuih ati so’e yo bona udi nasib ro, tapi lai ciek nan mambuek malu jo golak, sangkek jatuah dokek tang cubodak ro pisak sewa sidaihpoman sampai suntiah kuyak ditambah lo jaga wa’e nan sagodang ulu pisau panyaik tandan onau ro tajulua lo mancigap kalua.

Itu lah nan bedo, sanehe mintuo jo umak paja nan maambiak daun pua untuak atok olun pulang kaghumah lai, ndo katoghi tadonga teh nyoh mintuo do batuyak :” oi sutan ! ba’a mangko baghadak-an lo kamaghi pisau sighauik nan indo basaghuang ro” nyehe … Oi umak gho la nyoh tadonga lo suagho bini manyolo….,  Ontah lah nduang, dasar mintuo agak jontiak lo sobuak.

Montun teh, dek kaghono pitih balanjo kapasa nan sayuik takileh lo dalam pangona untuak bausaho nak manyolang pitih ka dunsanak subolah manyubolah mano tau dapek tulak ansua agak saghi duo, tapi ka diponga-an teh namo’e iduik dikampuang bak di awak montun pulo di ughang….. samo nyoh sado’e ndo lai nan dapek katompek batenggang doh.

Sadang duduak tamonuang pagi cako dokek bondua di bolek dapua tibo teh nyoh umak paja mancighocau : “Oi Ayah’e mano teh pitih balanjo ka pasa du nyoh, kok indo lai moh poi bausaho bagai molah, poi ka polak itoh mano tau lai cibodak mudo jo pisang nan ka dijua beko dipasa”. Manyauiklah pulo sidaihpoman : Ndai bini den, jak ati teh awak yo … pagi2 olah bakicau mughai kamenan, tambah komek jo ghau nampak di den” Yolah, soal ka polak ro beko pompotang lah den poi sakalian manjopuik nigho mudah2an indo lo diduduik dek cindu, tapi waden cuman maambiak sakadar pakanasi jo nyoh, nan joleh mauntiah lado kutu jo pucuak ubi, toghuang tunjuak, limpanjang jo batang sisanda, kok lai nan bakondak cibodak mudo jo pisang den laluan sakali.

Panambah pitih balanjo du, moh nantian lah waden sabonta poi kasawah lubuak, pokok’e cocah nyoh poi mambungkeh suak2. Namo’e ghasoki ala moh dapek teh nyoh lauak puyu jo kangkalang duo kampia ponuah, ndo siagak sonang ati sidaihpoman doh “lumayan nyehe dalam ati, kok dijua umak paja beko dipasa teh lopeh juo panambah boli minyak goreng jo kopi umak sangkot agak duo timbokan.

Sapulang daghi mambungkeh suak2 atau tobek2 disawah saklaian mamuleh daun taleh pambungkuih lauak puyu, tibo di umah nan umak paja nampak olah komeh, poni tajulua sobuak dibaliak tikuluak, babodak fanbo, bagincu sighah bagai. Singkek caito sambia golak manih basaghoto losuang pipik dipipi sabolah kida jo kijok mato, mako baghangkeklah umak paja kapasa pokan ghuba’a pasa tolu.

Timpak nan daghi pado itu, sidaihpoman poi baliak kasawah manyudahan buek nan olun salosai dikaghojoan batanam boniah duo satangah pighiang lai. Lopeh luhua umak paja olah tibo pulo baliak di umah sambia manenteng balanjo dapua untuak boka sapokan. Salain itu tabaok pulo nampak’e sabungkuih makanan, duo bungkuih sate ndo pakai sate (katupek jo kuah sate jo nyoh) untuak papaja nan banamo midun jo si banun, sadangkan untuak Ayah’e (sidaihpoman) lai okok putiah sabungkuih merek GG (gudang garam) salobiah’e pucuak onau nan olah bakuduang tigo guba jo timakau pikumbuah satangah tayia.

Sakitu lah dulu, sambia mananti komentar dunsanak rangtalu malakik sonjo beko nan siDaihpomah ba siap2 dulu poi ka sosok ditopi polak pua manjopuik nigho.

Wassalam,
Dasril Alies Van siDaihpoman, Jakarta 2012.

2 Comments

  1. rurul Reply
  2. Antoni Reply

Reply