Belajar Bahasa Talu : “Utak Nyolang Jo Utak Kantang” Bag. I

Sakapua sighiah,
Dunsanak jo simpatisan Rang Talu sado alahan’e, Sabolun caito ka dimulai nan partamo dimintaklah mo’oh talobiah dulu daghi sidaihpoman nan punyo caito. Tontuan teh, sapitau didalam caito nan ditulih lai namo jo gola nan saghoman, tompek nan samo – ogham tolak olah indo lai sobuak tido doh pangona basingajo salain kabotulan, sobab apo nan dicaito-an cuman sakada angan2 atau khayalan panulih samato nan dalam istilah tulih manulih disobuik caito fiktif atau rekayasa.

Sapinteh Lata Belakang

Bamulo caito daghi Niak Toman dikampuang Lombah Polak tapi namo baliau nan sabona’e “Norman” batambah dengan “Sati” dibalakang namo’e, jadi namo longkok di kaghotu panduduak tatulih Norman Sati. Ba’a lo mangko baimbuah kato sati dek kaghono ughang’e salain bagak, pandeka silek tuo, basaghoto lo soti alias ndo menpan konai pakuak ladiang atau konai tusuak pisau balati, Konon koba’e tabotiak tabaghito daghi ughang tuo2 dizaman peri-peri (PRRI) dulu sakitar taun 1958 -1960 niak toman soto ka ghimbo anang untuak mangungsi dek di koja2 tantaha pusek (APRI) nan masuak mandaghek malalui pantai Sasak toghuih ka kampuang itoh nan banamo nagori Tolu jo Sinuruik. Ba’a mangko ka tolu tujuan tantaha ro dek tasobauk di tolu adolah markas patahanan pambaghontak nan dipimpin tokoh peri2 sangkek itu kalau indo salah  Kolonel Achmad Husen jo Azwar Tongtong, tapi ndo lai hubungan tali daghah bagai doh apolagi badunsanak dengan Ayu Tingting panyanyi dangdhut kinin nan tamusohua jo logu Alamaik Palosu. Nan joleh kaduo’e sampai TALU-ncua babini dengan ughang tolu.

Baliak caito ka Niak Toman, ponah sakali di tongah malam sipek tadonga anjiang eboh manyalak bakapanjangan sasudah itu tadonga lo bodia malotuih tigo kali dan kabotulan Niak Toman malam ro sadang pulang basibagak kaghumah bini’e dikampuang lombah polak atau tughun daghi ghimbo pangungsian untuak manjompuik boka jo pisau sighauik kasayangan’e. Sasudah kajadian malam ro ughang kampuang bagunjiang kokin kamai indo dilopau indo disawah jo ditopi tang ayia, gunjiang ro bahaso Niak Toman malongko sabolun sampai dighumah bini’e konai tembak dek tantaha tigo kali tapi nan wa’e ndo ba’a tido doh, sadangkan caito versi tantara baliau konai di tembak dan laghi baliak ka tongah ghimbo. sajak itu teh tasobuik lo niak toman ndo menpan konai tembak. Tontang Niak Toman insya Allah isuak kitoh pelok pulo caito tasandighi.

Adiak padusi Niak Toman nan banamo Siti Ambun Suri tapi sasudah bacucu biaso pulo  dipanggia ghang kampuang Nek Tiombun. Timpak nan daghi nek tiombun  punyo anak batigo ughang nan paliang tuo banamo Siti Harumnah, anak nan tongah banamo Siti Aminah ditambah sughang laki2 nan paliang kociak banamo Ahmad Sodiqin. Kabotulan anak2 nek tiombun olah dewasa sado alahan’e dan olah baghumah tanggo pulo atau istilah kampuang’e lah-balaki jo olah babini. Siti Harumnah jo Siti Aminah sajak kociak dipanggia ayah umak’e Tioghun samo Tiamin. Sadangkan Ahmad Sadiqin sasudah babini dipicayo mamongku jabatan sabagai Tumalin kampuang, jadi sajak itu lokek lo namo panggilan baliau Malin Sodiq.

Montunlah sanak, itoh mulai bacaghito “Utak Nyolang jo Utak Kantang” ..sasuai judul di ateh, mongko caito’e : Etek Tioghun (Siti Harumnah) punya tumpangan iduik banamo Mohidin biaso nan dipanggia Pak Guru Modin dan punyo anak banamo Adri Parman (Adi) jo Siti Syaripah (Ipah), sadangkan Etek Tiamin (Siti Aminah Sari) punyo laki pulo banamo Marah Nurdin dan punyo anak sughang tungga babeleng nan indo ba-kakak ba-radiak lai.. yang diagiah namo Johin Pahlawan. Dicoliak umua, si Adi jo si Johin ampiang sabayo sobab lahia di taun nan samo cuman balain bulan jo aghi kok tibo di badan sapinteh lalu samo godang pulo cuman beda kughuih jo badogok. Keluarga tek tioghun salamo’e sajak kociak tingga dikampuang lombah polak dek laki tek tioghun (guru modin) bakaghojo sabagai guru SD disampiang ba-sawah sakaligus jadi guru mangaji pulo di ghumah, walaupun iduik sederhana tapi anak2 wa’e si Ipah jo si Adi ghajin basikola dan codiak2 pulo alias punyo “utak nyolang”.

Lain dengan keluarga tek tioghun mako tek tiamin (ibuk Siti Aminah) sabolun tingga manotap  dikampuang ughang ro sakaluarga iduik dighantau, sobuiklah di kota Padang dek kaghono pak Marah Nurdin bakaghojo di salah satu bank swasta dan tontu agak mandapek alias kayo lo sobuak atau iduik bakacukupan walaupun pak Nurdin cuman kojo jadi kalerek di kantua. Anak nan sughang tongga babeleng banamo Johin Pahlawan olah tabiaso iduik monjo ndo katuanan – apo dimintak apo dapek jaghanglah kondak nan indo balaku, maklumlah namo’e anak samato wayang, sa-andai indo dapek nan dimintak si Johin pasti mahansik bakapanjangan.

Dunsanak, yang namo’e pangidupan jo jalan iduik manusia indo kalopeh daghi takodia jo paghuntuangan nan olah ditontuan dek Tuhan Allah Swt dan itoh sabagai umaik hanyo tingga manjalani. Malang ndo dapek dighayiah mujua ndo dapek ditulak, mujua sapanjang aghi nan malang sakijok mato.  Montun teh, sakitar taun 1998 ampiang di sado suduik jogaik dunia tamasuak di Indonesia olah tajadi kakacauan di bidang ekonomi jo pitih mamitih sampai bakalebuik nan tamusohua jo krismon (krisis moneter) sainggo banyak pagawai swasta tapaso baghonti bakaghojo dek ulah konai Pehaka. Indo pagholu dipapanjang masalah krismon, nan joleh pak Marah Nurdin tamasuak pagawai nan konai pehaka pulo sangkek itu tapi alhamdulillah moh lai mandapek uang tulak nan cukuik lumayan godang’e ditaghimo.

Lopeh maso krismon walaupun pak Marah Nurdin jadi pangangguran dek uang tulak cukuik banyak mako keluarga buk Siti masih tingga di kota padang, tapi yang namo’e pitih talotak kalau indo lai pancaghian untuak panambah tontu lamo kalamoan bisa abih lo teh nyoh punseng ndo basiso. Sungguahpun agak talambek, tapikia umua nan kabatambah tuo juo apolagi mangona maso depan si Johin anak palito ati kasayangan baduo kadughang nan baghu kolaih duo di SMP, mako bapokaik lah ibuk Siti jo pak Marah Nurdin untuak mancubo mamugo iduik baghu di kampuang buk Siti alias pulang kakampuang asa.

Aghi potang sonjo lah tibo, lopeh mugoghik sasudah makan malam baghetonglah buk Siti samo pak Nurdin batigo jo si Johin mangecek daghi ati ka ati ditimbang elok jo bughuak pindah kakampuang. malakik wakotu isya tibo alhamdulillah lah dapek kato mupokaik baduo laki bini, bak kato patatah minang juo …”bulek kato dek mupokaik – bulek ayia dek pambuluah, kok bulek olah bisa digolek-an – kok picak olah bisa dilayangkan, layia takombang angin tibo – lauik nan dalam ka di aghuang.

Sabolun mato takantuak buk siti poi kabiliak muko manulih sughek duo pucuak, sughek tatuju ka uniang Tioghun bacaghito tontang niak nak pulang abih kakampuang. Sughek kaduo kabokeh Mamak Toman baduo jo Malin Sodiq adiak kanduang, salain bacaghito tontang apak si Johin nan konai pehaka tapi dalam sughek ro bakecek-an pak Nurdin mamintak pangsiun mudo kaghono baniak iduik dikampuang, sakalian lo nak mamintak isin maunyi  umah tuo. Sajak Nek Tiombun (Siti Ambun Suri) umak buk siti jo tek tioghun maningga memang umah tuo ro umpamo ndo baunyi doh, pampaliang Niak Toman nan tidua dibiliak dokek dapua, nan 2 (duo) buah biliak lai dibagian muko salamo gho kosong tapi salalu dibaghosiahan dek si Ipah anak tek tioghun. Sadangkan tek tioghun olah mambuek umah sughang di ateh tanah sabolah umah tuo.

Niak Toman punyo anak sughang laki2 banamo Duna bagak (Adnan), sajak bini’e maningga di Mokah wakotu naiak oji baduo pulang ka umah dunsanak sobak ndo punyo anak padusi nan ka ditompang, tapi cagho dikampuang jangga nampak’e kalau masih tingga di umah bini nan olah maningga dunia.

Kampuang lombah polak talotak di legheng bukik sakitar nagori Sinuruik sabolah Tolu kacamatan talamau nan banamo bukik jonjang kambiang, tapi ontah sajak bilo bamulo sobutan bagi dunsanak di paghantauan nan baghasa daghi kacamatan talamau indo tuka baghubah apokah daghi tolu apo sinuruik jo kojai salamo gho cuman disobuik ciek namo nagori yaitu “Tolu atau Talu” dan bilo ditanyo dima kampuang asa pasti di jawab “Talu”, kalau ditanyo uhang mano pulo nan tasudah biaso dijawab “Rang Talu” atau kami urang talu.

Rami lah rami pasa rang talu – rami dek anak si urang kajai,

Dimalah hati indak ka rindu sadang disayang badan bacarai.

Satonggak jalan yo nan luruih

Babelok jalan kabatang umpai,

Ba sabab badan mangko nyo kuruih

Banyak mungkasuik nan indao sampai

Kigho2 bontuak bunyi pantun logu “Rang Talu” itu bonalah nan taghaso dek ibuk Siti Aminah (buk siti) jo pak Nurdin baduo kadughang. Sabolun pulang ka kampuang, dek pitih kacio olah sayuik tingga basiso sakadar untuak iduik 3 (tigo) bulan tontu pagholu pitih ka boka iduik tingga di kampuang. Olah dikaji untuang jo ghugi, sosa daolu pandapatan sosa kudian ndo baguno, dek lah padek paretongan ghumah ghancak sadang elok mantereng indo sobuak nan di kota padang tapaso ka di lego dijua pulo.

Rumah talotak dilubuak bagaluang

Induak somang lamo nan mamboli

Pulang kampuang di baok untuang

Mudah2an dikampuang sonang ati

Syahdan al-kisah, timpak nan daghi pado itu olah basuo ghueh dengan buku, topek katiko tibo lo maso, mako keluarga buk Siti Aminah nan batigo ughang samo laki wa’e pak Marah Nurdin saghoto anak’e si Johin pulang kakampuang hanyo lai. [Basambuang ka Bag. II]) …,

 

Jakarta, 08 Feb. 2012

Dasril Alies (siDaihpoman)

Note : Berhubung postingan cukup panjang, maka tulisan dibagi menjadi beberapa bagian [Sipangka]

 

2 Comments

  1. kiki almalay Reply
    • Al Miter Reply

Reply