Mar 14, 2012 | Galeri Fiksi, Konten Terbaru
JOPA Badongkun di Malam Perpisahan
Sapokan sasudah salosai ujian pangabisan dan olah jadi kabiasaan pulo satiok taun sikola sempe tolu mambuek acara perpisahan sakaligus tompek manyalurkan bakaik anak mughik sempe (kelas satu sampai kelas tigo) dibidang kasenian baik manyanyi, puisi, managhi atau di bidang akting sandiwara. Katiko anak sikola manyanyi atau managhi tarutamo anak2 pidusi kelas tigo olah mulai tampak bolang’e, mungkosuik’e katiko olah mamakai pakaian bebas (ndo seragam sikola) ditambah pulo jo dandanan ughang dewasa longkok dengan gincu sighau di bibia jo calak disuduik mato, Kalau olah bapanampilan condo ontun tanyato papaja remaja ABG ro olah baghubah manjadi anak gadih jolong godang dan olah patuik pulo balaki cagho saisuak, sainggo mambuek tambah mabuak pomle wa’e sunsughang bahkan bisa mambuek jakun pak guru playboy tughun naiak sampai tobik salegho bughuak ndo ubah bontuak lauak utiang makan anak.
Olah tibo katiko nan dijangko jo aghi nan ditontuan yaitu malam akaik mulai pukua 19.15 WIB, mako dimulailah acara “Malam Perpisahan Siswa Kelas III SMP Negeri Talu” di Gedung Pertemuan nan kinin banamo Gedung Anak Nagari, nampaklah gadih2 mudo ghancak atau anak sikola sempe mamakai baju bebas nan paliang mode sangkek itu, sadangkan anak laki2 olah pakai pantalon pulo kasado alahan’e. Nak agak lain daghi nan tasudah tontang pangaturan tompek duduak mughik padusi jo mughik laki2 dipisah sabolah kida jo sabolah kanan. Pamisahan tompek duduak ro supayo katiko acara bajalan mughik2 bisa taghotik dan papaja nan suko bagoluik ndo punyo kasempatan apolagi badongkun. Khusus untuak siswa berprestasi duduak dokek majelis guru2 sadangkan si Enti duduak pas dibulakang kughisi Ibuk Nelih sobab si enti jadi juara umum sempe sangkek itu.
Oh iyo, lai nan pagholu dia agiah tahu sobuak ka generasi mudo tolu jo sinuruik bahaso di dindiang pangguang gedung pertemuan Talu lai 2 (dua) buah lukisan godang talotak disabolah kida jo kanan tapampang lukisan Tuanku Imam Bonjol jo Pangeran Diponegoro sadang naiak kudo. Nan mabuek lukisan ro namo’e Boni ughang Baulak jo Abdul Rahman ughang tinggam nan dilukis ughang ro baduo sakitar taun 1960.
Singkek caito, topek pukua pukua 19.30 WIB dimulailah acara dengan mambacoan tertib acara dek protokol, nan partamo pidato pembukaan dan laporan Adhi Pramanta sabagai katua Panitia, lanjuik pulo sambutan wakil ghangtuo mughik nan tomaik dan panutuik sambutan jo pangarahan daghi Kapalo Sikola sempe Tolu. Sasudah itu dimulailah acara hiburan dengan Sandiwara 2 (duo) babak bajudul “Anak Bangsa” nan diawali jo paduan suara kelas 3 dengan logu “Nyiur Melambai jo logu Rang Talu”, sasudah itu lanjuik pulo paduan suara gabungan kelas 1 jo kelas 2 dengan logu “Tanah Airku jo logu Batang Sinuruik” dana disudahi jo paduan suara pak guru jo ibuk guru. Sandiwara Anak Bangsa disolo dengan manyanyi jo managhi mocam2 antagho lain taghi pighiang pakai lilin jo taghi galombang pakai sewa galembong. Salain itu lai pulo baco puisi samo acara penyerahan piagam siswa berprestasi rangking 1 sampai 3.
Dalam pado itu, katiko acara sandiwara dengan palaku utamo si Utam j(Rustam) jo si Moni (Murni) sadang bajalan kigho’e si jopa olah ghosah lamo mananti si enti di suduik goduang bagian balakang dokek ughang bajaga kacang goreng barondom, istilah’e papaja ro nak badongkun cagho saisuak. Maklumlah kalau didalam goduang ndo ka bisa doh sobab tompek mughik padusi jo mughik laki2 nan tapisah apolagi si Enti duduak ndo jauah daghi ibuk guru Nelih yang kito tau adolah ibu kanduang dek si enti. Sabona’e si enti juo ghosah bakalesong duduak dokek ibuk wa’e bontuak kambiang dek ulek sobab takona jonji dengan si jopa, samo maklumlah itoh bahaso papaja nan baduo ro memang sadang dimabuak cinto boghuak alias cinto monyet.
Panjang juo aka si enti, sambia babisiak katalingo ibuk nelih disampaian lah bahaso wa’e nak poi mamboli kacang goreng sabonta kalua goduang padohal sabona’e nak badongkun dengan si jopa. Sabolun basuo dengan si jopa talobiah dulu si enti mamboli kacang goreng duo tungkuih kaghoteh saklaian gulo2 karet untuak dimakan baduo.
Dulu, papaja badongkun pampaliang pakai sughek2an nan disolek-an dalam buku palajaran pomle sunsughang, kok indo duduak badokek sambia minum ayia sitorop saboto baduo sakalian makan bubua samba jo kupuak lepoh di kantin sikola, sobab sangkek itu olun lai anak sempe nan punyo hape condo maso kinin. Tapi lain dengan paghangai si jopa nan ocok manonton pilem remaja wakotu sikola di padang, sadangkan di tolu pampaliang ughang manonton pilem layar tancap dengan caito untuak sagalo umua saghoman pilem lawak Benyamin S atau pilem Edi Sud.
Babaliak caito ka si jopa jo si enti nan sadang asyik badongkun di tompek kolam, mulo2 cuman maota tontang koma ka malanjuikan sikola sasudah tomaik sempe tolu sambia mangulum gulo2 karet di muncuang, olah ontun ba-tuka2 permen nan olah dimakan tapi ujuang2’e makan permen baduo ro sampai ampia baghadu bibia masiang2. Kalau soal idu maidu pipi salamo gho ponah juo apabilo lai kasempatan, nan ocok katiko ughang latihan persiapan acara perpisahan di sikola nan kangkadang sampai sonjo ghayo baghu salosai.
Nan sakali gho, ontah setan apo nan masuak ka utak busuak si jopa tapi dalam pikighan wa’e hanyo sakedar mambuek kenangan nan bakosan sobab sapokan lai ka bapisah dek kaghono si enti kamasuak sikola parawat bidan di bukik tenggi sadangkan si jopa totap sikola di tolu masuak sikola SMK nan baghu tabukak di jalan ka ayia angek sabolun jambatan sianok. Montun teh, ndo miang dikatoghi tibo2 si Jopa manyosoh bibia si Enti alias mancipok bontuak nan ponah diliek wa’e wakotu manonton pilem sabolun pindah ka kampuang lombah polak daghi padang. Tontu apo nan dikaghojoan dek si jopa galesek ro, mambuek si Enti takasima apolagi pangalaman partamo nan indo ponah tabayang sobuak tido sabolun’e. Walaupun pangalaman partamo tapi nan si jopa jo si enti agak lamo lamo juo bacipok sambia bapoluak basanda didindiang goduang. Kajadian ro baghu baghonti dek tasobauk si enti ghungkungan wa’e tacokiak dek talulua permen karet sagodang ampu tangan nan sadang dimakan’e.
Sasudah kajadian ro baghulah sadar si enti apo nan olah dikaghojoan si jopa ka bibia wa’e nan bagincu, sambia manangih antagho takinyam jo beghang ka si jopa tapi dek lobiah banyak ghaso beghang mako ndo di songko sabolun’e si Enti lansuang malompang pipi si jopa sakuaik tanago, olah ontun ndo malengoh kabulakang si enti lansuang masuak ka dalam goduang baliak sampai lupo mambaok kacang goreng nan sadio’e untuak ka dimakan baduo dengan buk nelih. Tinggalah si jopa tapongau sambia mangusuak pipi nan konai lompang dek si enti kasayangan wa’e, takona pulo dalam pikighan si jopa parasaan takuik si Enti indo ondak bakawan lai bahkan ndo sudi basuo jo manyapo bagai. …Ontahlah sabona nyanyuak pikighan si Jopa maso itu.
Dunsanak sado’e, kok ba’a teh kalanjutan caito si jopa jo si entin sasudah acara perpisahan malam akaik nampak’e tapaso basoba sampai pokan muko, jadi sambuangan’e ro samo2 kitoh nantian molah di status BAHASO TALU- Pokan Ghuba’a, Insya Allah….!
Jakarta, 15 Feb. 2012
Dasril Alies (siDaihpoman)
Kamus Bahasa Talu :
———————————————————
panggaya = suka bergaya, suka pamer ; sempe = SMP ; manangguak = mencari ikan;
tangguak = alat penangkap ikan terbuat dari jaring dan dibingkai secara melingkar ;
mambaliak = membalik atau membenamkan rumput sawah kedalam lumpur ;
mancokok = menangkap dgn cara menelungkupkan telapak tangan ;
taghesek, = kena raba, ghesek = meraba ; mandehe = menangkap ikan dgn tangan ;
tapokiak = terpekik, menjerit ; maoghang = menangis kesakitan ; wa’ang = kamu ;
pantak = benda yg runcing ; songek = patil ; kangkalang = sejenis ikan lele ;
aghiang = bau pesing, bau air kencing ; jaga = kata ganti atau sebutan utk kemaluan ;
lesuik = menyusut ; bakoghuik = berkerut ; mangangkuih = ampuh, mujarab ;
takapila = ngawur, tdk jelas ujung pangkalnya ; golak bakulum = terseyum simpul ;
mugoghik = waktu maghrib ; tekong = takaran beras terbuat dari kaleng susu cair ;
cucuak = tusuk ; paotua = alat utk merajut/penusuk ; di salai = dipanaskan di atas api ;
di diang = dipanaskan dekat api atau disamping api nyala ; mosiak = kering ;
dighameh = diremas ; kopi daun = kahwa, bubuk minuman terbuat dari daun kopi ;
mada = bebal, susah diaja, agak bodoh ; locik = pecut, dilocik = dipecut ;
kaji = pelajaran mengaji ; libeh = libas ; manyinga = terasa panas seprti kena cabe ;
beghang = marah ; pomle = pacar, pujaan hati ; sitereng = streng, ketat, disiplin ;
koteh / kaghoteh = kertas ; bakutiak = berkutik, ndo bakuitak = tdk bisa berbuat apa2 ;
gincu = lipstick ; sighau = merah menyala, sighah = merah ; ghutiang = ikan gabus ;
dijangko = diperkirakan, dijadwalkan ; pantalon = celana panjang ;
galembong = celana longgar berwarna hitam ; kacang goreng = kacang garing ;
barndom = berendam, biasanya kacang tanah sebelum digaringkan direndam dulu ;
tungkuih = pembungkus dari kertas ataudaun ; baghadu = ber-adu, bersentuhan ;
manyosoh = merangsek, menyerang ; mancipok = mencium bibir; galesek = reseh, usil
ghangkungan = kerongkongan ; nyayuak = mumet ; malompang = menampar
Mar 14, 2012 | Galeri Fiksi, Konten Terbaru, Pendidikan, Seni Budaya
JOPA (Johin Pahlawan) Sikola di Kampuang
Ndo dipapanjang caito, nan namo’e si jopa anak pindahan daghi kota, tontu agak balain teh nyoh sobuak lagak jo kughenah wa’e dibandiang dengan papaja tolu sinuruik nan indo ponah manginyam sikola di kota, malah sangkek itu papaja ro istilah’e indo ponah talampau daghi Panti doh, paliang jauah poi jalan2 dharmawisata ka topi lauik di Sasak atau poi ka Lubuak Landua samo mancoliak ayia tojun di Saghosah nagori Cubodak.
Condo ontunlah, si jopa salain tiok aghi poi sikola banyak pulo wakotu untuak bamain dengan kangkawan’e samo godang di kampuang lombah polak apolagi nan si jopa memang agak pamaleh pulo baghaja tamasuak mangaghojoan PR tugas sikola di ghumah tapi nan mangaji qur’an lai ghajin. Kalau lai tugas PR pampaliang si jopa lobiah ocok manyalin jawaban nan di buek si Adi atau si Adri Parman ( Anak Dari Paroman) atau lain’e wakotu baghaja samo2 di umah pak guru modin atau manyalin jawaban nan olah dipelok si Entin (Yustina Permata) wakotu pagi manjalang masuak kelas di sikola. Salain Adi jo si Entin si jopa juo punyo kawan sakelas nan akrab di kampuang banamo Darul, si Ajaih, Upik komek jo Sewan, sadangkan di koto panjang lai pulo konco palangkin wa’e banamo si Utam samo si Jamal nan anak ughang labuah togak tamasuak pulo jo paja pasa nan banamo Moni Manih.
Ponah sakali aghi Akaik si jopa dibaok Darul poi manangguak mancaghi lauak ka bonda ditopi sawah mak tuo tioghun’e di sawah lubuak dokek tang ayia poman. Nan paliang tagia mancaghi lauak puyu di tongah sawah di musim mambaliak, tingga mancokok miang nyoh ka dalam lubang bekas jojak kaki ughang mambaliak sobab ayia nan tagonang di sawah ndo bogha doh salain luluak goca, kangkadang lai ghutiang bagai, tapi nan ghutiang ro agak soghik dapek’e nyoh, sobab baghu taghesek sobuak ghutiang ro lansuang maluncek sampai omuah konai iduang bagai dek’e.
Olah ponek manangkok puyu di tongah sawah si darul jo si jopa poi katongah bonda mancaghi lauak, dek ayia bonda godang tontu agak soghik dapek lauak ditangkok jo tangguak kociak, jadi’e si jopa jo darul tapaso mandehe di solo2 batu jo ditopi tobiang bonda. Kalau Mandehe ro nan tasudah lai juo dapek lauak nan agak kasa sobuak saghoman kapogheh jo sighokan, kangkadang lai lo dapek mujahia nan anyuik daghi tobek Niak Toman. Sadang asyik papaja baduo ro mandehe, ndo katoghi tadonga teh nyoh si jopa tapokiak dek kasakik-an “uuuuuuih” nye si jopa maoghang sampai kalua ayia mato sambia ma ombuih2 talunjuak tangan’e. Sasudah ditanyo si darul ..”Jopa ba’a lo ajak’e mangko wa’ang sampai tapokiak jo kasakitan nampak di den, apo wa’ang konai pantak dughi atau konai cetuih dek labi ?. manjawab lah si jopa, ndo konai pantak bagai doh tapi ambo konai songek kangkalang. Tuteh wa’ang ndo bapangalaman mandehe lauak, kalau mandehe kangkalang ro harus dipociak-an daghi bagian kapalo ndo teh omuah daghi bagian ikua doh, olah teh maoghang ro nye si darul. Apo teh kaubek’e gho, ndo siagak sakik’e doh nye si jopa pulo batanyo ka si darul. Olah teh maoghang ro nye si darul, ubek’e mughah na nyoh, konciang-an talunjuak wa’ang ro…, nondak doh pakai ayia konciang aghiang bagai nye si jopa. Hoooi wa’ang lah gho diagiah tau ughang malah mocam lo nye ‘ang, cubolah lah dulu nye si darul, kok aghiang na teh bisa dibasuah baliak beko.
Montun teh, ndo banyak cengcong doh apolagi dek indo tahan manahan sakik kasudahan’e dikaghojo-an juo dek si jopa sambia mangalua-an jaga wa’e nan olah lesuik bakoghuik dek ulah lamo taghondam dalam ayia bonda. Wakotu disigham jo ayia konciang ro taghaso agak angek2 sobuak dek si jopa, Ndo lamo doh sasudah itu “picayo ndo picayo” tadonga si jopa mangecek ka si darul …”iyo bona mangangkuih resep ubek takapila wa’ang ro darul, kinin olah ilang sakik’e padohal cako ndo siagak sakik’e doh man-donyuik2 ka teh ubun2 di kapalo nye si jo sambia golak bakulum.
Kalau malam aghi biaso’e salopeh mugoghik, si jopa jo papaja kampuang dokek umah Ibu wa’e (tek Tiamin) baghaja mangaji ka ghumah mak tuo wa’e atau umak dek si Adi (tek Tioghun) dan kabotulan nan ma-aja mangaji ro pak tuo wa’e (Pak guru Modin) ayah si Adi nan banamo longkok Adhi Parmanta jo si Ipah (siti Syarifah). Lai teh ciek nan agak lain daghi nan lain ditompek lain, kalau papaja partamo kali dianta poi bagahaja mangaji di kampuang lombah polak, biaso’e sakalian dibaok cucuak daun kopi jo bogheh tigo tekong nan dibayia sakali sapokan. Cucuak daun kopi sabona’e untuak pa-otua daun kopi nan ka disalai atau didiang di ateh salayan atau dokek tungku dapua. Daun kopi nan olah mosiak dighameh sampai caia dan olah aluih jadilah “kopi daun” nan ayia’e untuak diminum sabagai panggonti teh. Sadangkan guno cucuak daun kopi di tompek mangaji adolah untuak malocik papaja nan mangaji ro agak mada sobuak atau olah baulang kali diaja mambaco qur’an atau sughek amma indo miang mangetuih atau indo ponah apa dek’e katiko disughuah maulang baliak apo nan olah diaja guru malam sabolun’e. Jadi papaja nan mada ro buliah di locik dengan cucuak daun kopi nan disoghah-an umak wa’e sangkek partamo kali mangaji supayo ghajin baghaja atau maulang kaji.
Nan konai locik atau konai libeh ro biaso’e ujuang jaghi nan sadang manunjuak apo nan dibaco, …..bogha teh podiah’e konai locik cucuak daun kopi nan lamo konai asok podeh lado gulai atau sagalo mocam nan dimasak diateh tungku dapua, bagi papaja nan ponah magahsoan kecek’e “sabona podiah jo angek manyinga”.
Yo lah babaliak itoh ka caito jo kughenah si jopa basikola di sempe tolu, sabona’e utak si jopa lai agak codiak atau sedang2 saja alias ndo andia bona doh, tapi itu juo teh kaghono si jopa anak sughang tungga babeleng dek ayah umak’e tontu tabiaso monjo, kalaupun agak pamaleh baghaja sajak dulu nan wa’e ndo ponah konai beghang doh. Apobilo papaja maleh baghaja, ba’a bona codiak’e tontu ndo ka bisa maksimal nilai ujian nan didapek. Cuman dek si jopa pandai bakawan apolagi ocok pulo mantraktir balanjo dikantin sikola katiko kalua main tontu banyak kawan2 wa’e nan sayang tamasuak si Enti anak buk guru Nelih. si Enti nan imut ro, kulik putiah, iduang mancuang balosuang pipik pulo, olun lamo bona lai jadi pomle si jopa pulo, kok dikaji soluak boluak cagho dikampuang antagho si Jopa dengan si Enti sabona’e ughang ro baipa kontan sobab ayah buk nelih adolah adiak sanak ibu dek nenek Tiombun nan umak pulo dek maktuo Tioghun jo tek Tiamin (ibu si jopa).
Jopa dengan si Enti olah jadian sajak pulang acara jalan2 ka simpang timbo abu, kajadian’e bamulo dek ulah si enti tagaliciak di batu godang licin sampai tajatuah ka batang tonga dokek jambatan panjang dan kabotulan nan manolong maambua ka tang ayia ro si jopa sampai kaduo’e basah kuyuik. si Jopa memang anak gaul dan sipaik gaul ro olah tabaok sajak wa’e sikola di padang, disampiang tampang wa’e gagah lo sobuak, parlente, kulik baghosiah kuniang lansek sainggo banyak pulo guru2 nan sayang kabokeh jopa tarutamo ibuk2 guru baiak nan masih gadih atau nan olah balaki jo punyo anak.
Salain kabiasaan si jopa salamo gho manyontoh jawaban PR alang aghi, katiko ujian pun si jopa tabiaso pulo manighu (nyontek) ka kawan sabolah munyubolah nan bongku wa’e badokek-an baiak disampiang kida jo kanan ndo katinggalan kabokeh kawan2 nan duduak dimuko atau di bulakang. Kalau guru pangawas suko santai sambia mambaco buku atau indo sitereng bona tontu si jopa bisa bebas manyontek koteh ujian kangkawan’e tarutamo ka si Adi atau ka si Enti sainggo bisa dapek nilai ghancak, si Adi jo si Enti memang tasobuik anak2 nan codiak dan biaso’e ocok batuka tompek jadi rangking satu atau rangking duo sajak masuak kelas satu sempe.
Tapi katiko basuo pangawas ujian nan sitereng tontu si jopa ndo bisa bakutiak sobuak tido manyontek jawaban kawan2’e, kadang2 mujua jo tatolong dek koteh sontekan nan ditulih diateh koteh kociak atau nan batulih dipangka pao dibawah sewa pendek nan dipakai’e. Cuman yo itu, nilai rapor wa’e kok indo ka sighah pampaliang dapek angko 6 (onam) atau lobiah sobuik samisal 6,75 (onam koma tujuah limo) tapi lumyan jo lah. Kigho2 Montunlah kughenah si jopa, tapi alhamdulillah katiko ujian pangabisan nan si jopa lai lulus.
Jakarta, 15 Feb. 2012
Dasril Alies (siDaihpoman)
Feb 8, 2012 | Galeri Fiksi, Konten Terbaru, Pendidikan, Seni Budaya
Pulang Kampuang Ka Lombah Polak
Sasudah tajua umah di padang, mamintak ancik kabokeh induak somang lamo nan mamboli umah di lubuak bagaluang salamo tigo aghi untuak bakomeh mam pak baghang pocah bolah, paghiuak jo kuali ka dalam peti. Dilipek pulo kain mangain saghoto baju mambaju ka dalam itaih nan jo koper ndo lupo tivi nan 27 inchi apolagi ketangin balap punyo si johin.
Puncak talamau basalendang kabuik
tampak cenceng nan daghi pasa tolu
salamo di paghantauan sonang iduik
kinin pulang kakampuang nan dituju..
Potang Sotu malam Akaik manumpang oto Mandala daghi padang nan dikaco balakang tatulih “KOMA RO” indo ponah disongko jo dikatoghi dek buk siti, pak Nurdin jo anak’e si johin olah sampai di simpang kantua camaik talamau dokek pasa tolu. Aghi lindok bontuak ka ujan, ayia mato balinang jatuah ka dalam montun pangona ibuk siti dibaok parasaan dek ati ibo mangona nasib paghuntuangan dikampuang iduik ka di-adang. Badobok daghah di dado pikighan bacampua aduak, tabayang kota padang nan batingga-an tabayang wajah tetangga dokek ghumah kawan maota potang jo pagi, indo buk Eti nan muncuang cipeh, indo uni Modis nan lanca, si Ida nan palinggoman suko mamiciak, indo pulo etek Lauyar nan patuyak ka laki’e tiok aghi tamasuak nenek Gheno nan suko batandang kokin kamai, baiak tuo jo mudo nampak samo miang nyoh sado alahan’e ayia mato manobiang malopeh buk siti poi pulang abih kakampuang …. ontah bilo lo ka basuo.
Dikampuang lombah polak (3 km daghi pasa tolu) dighumah tuo paninggalan ayah jo umak Niak Toman baduo jo Nek Tiombun (alm. Siti Ambun sari) umak kanduang etek Tioghun jo buk Siti nan punyo umah soko warisan olah baghosiah, lapiak kumbuah tabontang dighuang tongah, sado dunsanak dokek sakatughunan jo niniak mamak olah mananti ughang ghantau nan ka tibo. Wakotu baputa toghuih minik ka minik tadonga kalason pupuik oto baghonti topek dimuko umah tuo tando’e tek Tiamin (buk Siti Aminah Sari) olah tibo. Ndo lamo sasudah itu datang Malin Sodiq adiak bonsu tek tioghun jo tek tiamin (mamak dek si Johin, si Adi jo Ipah) basugiro manjopuik baghang nan baghu tughun daghi ateh oto mandala ditopi labuah.
Olah naik sado baghang ka ateh umah tuo, olah basolam tek Tiamin, pak Marahudin samo si Johin dengan sado ughang nan mananti sambia malopehan taghagak sunsughang, lai nan manangih, lai nan golak, lai pulo nan cuman manobiang sobuak jo ayia mato’e nyoh, tapi nan joleh sabona eboh bontuak kapa pocah. Oh iyo sanak lai nan lupo, pak Marah Nurdin laki tek Tiamin kalau pulang kampuang biaso dipanggia Marahudin dek dunsanak jo ughang kampuang Tek Tioamin nan lobiah tuo kaghono baliau bagola Marah dan banamo Nurdin, jadi supayo praktis maimbau namo Marah Nurdin digabuang manjadi Marahudin. Ndo dipapanjang caito, si Johin olah mulai sikola di SMP Tolu dan satu kelas pulo dengan si Adi anak mak tuo tioghun’e kabotulan olah naik pulo ka kelas 3 (tigo).
Wakotu si Johin partamo kali masuak sikola wa’e ditanyo dek ibuk guru Nelih (Nelisya Panggaya) nan muncuang’e cipeh kangkadang bontuak ndo ba-bandrol tamasuak agak pambeghang dan ocok mamiciak pusek anak mughik’e nan pamaleh mambuek PR atau atau mughik padusi suko manyenyeh mati kaghancak-an, tapi sabona’e ati ibuk ro elok dan paghatian ka anak mughik. Ibuk nelih batanyo ka si johin : “Oh.. ini sanehe anak murid baru itu, sia nama kamu nak ?..” olah ontun dijawab dek si johi : “Saya buk, nama lengkap saya si Johi Pahlawan buk guru” … mandonga namo johin ro ibuk Nelih lansuang bakomentar …”Nama kamu bagus pahlawan” …tapi si johi manyauik lo baliak …”buk guru, nama panggilan saya bukan pahlawan tapi si johin buk” …. tadonga lo baliak suagho buk nelih ” ya baiklah, kalau montun mulai hari kinin ibuk imbau ‘eh ibuk panggil saja kamu si Jopa, karena itu singkatan dari Johin Pahlawan. Mandonga buk nelih manggonti namo panggilan si johin manjadi si jopa mako saisi kelas ndo laki2 ndo padusi manjadi eboh, olah ontun tibo2 si Basrizal Ompong katua kelas 2B langsuang togak maagiah pangumuman ka sado kangkawan’e … ” sajak aghi kinin gho si johin kitoh panggia namo’e jadi Si Jopa.
Montunlah, buliah caito ijang talampau ba-tele2 bona kito aliah caito keluarga tek Tiamin pulang kampuang sungguahpun baghaliah disinen juo nyoh. Caito itoh lobiah banyak tontang si jopa samo Adi jo kangkawan’e salamo di SMP sampai tomaik di SMK Tolu tamasuak kughenah si jopa baiak disikola maupun pargaulan’e samo2 kangkawan sapamainan di kampuang lombah polak. Di awal caito lai disingguang bahaso anak2 tek tioghun jo pak modin nan baduo (Adi jo si Ipah) ghajin sikola dan codiak2 alias “utak nyolang”, tapi ontah ba’ a lo teh mangko diujuang caito tokoh utama itoh si Johi Pahlawan atau si Jopa sampai Ayah’e (pak Maharudin) manyobuik “utak kantang” atau Ninik’e (Niak Toman) nan manyolo jo tambahan namo “utak gotah boku”, jadi bacolah toghuih sampai tomaik.
Tontang lanjutan caito “utak nyolang jo utak kantang”, lobiah’e olah ba-jelo2 lo saghancak’e disambuang dalam catatan BAHASO TALU – Pokan Ghuba’a sapokan lai. Insya Allah !
Ndo dek sidoga bagai doh, cuman nan motiang itu juo teh, kabotulan aghi pokan Ghuba’a nan tukang caito koba bagalau olah taghagak pulo nak poi kapasa sakalian basuo jo induak bogheh nak mintak dibolian sagalo nan cak inan antagho lain pucuak sitopu, tindawan talingo boghuak, kulaghi batolua jo asam duyan. Mudah2an di pasa beko dapek pulo basaghobok dengan dunsanak rang talu di palanta lopau RTC (Rang Talu Community) sakalian maota jo minum kopi. [Lanjuik ka Bagian Katigo]
Jakarta, 08 Feb. 2012
Dasril Alies (siDaihpoman)
Terjemahan kata-kata & istilah khas Bahaso Talu :
sapitau = se-andainya ; Ogham tolak olah = haram (sungguh) tak pernah ; saghoman = seperti ;
longkok = lengkap ; kaghotu = kartu ; basaghoto = beserta ; soti = sakti ; bagak = pemberani ;
mamugo = memulai, awal pertama suatu kegiatan ; malakik = menjelang, sebelum ; sughek = surat ;
tantaha = tentera ; ghimbo anang = hutan belantara ; APRI = Angkatan Perang Republik Indonesia;
malam sipek = malam gelap ; peri-peri (PRRI) = Pemerintahan Revolusioner Republik Indonesia ;
mandapek = kata kiasan untuk orang yg berpunya = kaya ; kalerek (clerk) = tukang ketik ;
tongga babeleng = hanya satu2nya ; laki = suami (istilah dalam bahasa talu) ;
monjo ndo katuanan = manja tidak ketulungan (berlebihan) ;
mahansik = meminta, merengek (memelas) meminta sesuatu ; samato wayang = semata wayang (satu)
takodia = takdir, nasib ; bakalebuik = semrawut (heboh) ; pehaka (PHK) = pemutusan hubungan kerja ;
uang tulak = pesangon ; punseng = habis, tidak bersisa ; polak = kebun ; laki bini = suami istri ;
baduo kadughang = berdua orang, istilah bhs. talu untuk suami isteri ; aghuang = arung, melintas ;
mantereng = mewah ; sayuik = tanggung ; mamintak ancik = mohon pamit sebentar ; itaih = tas ;
ketangin balap = sepeda balap ; koma ro = mau kemana ; ndo katoghi = tidak disangka ;
muncuang cipeh = mulut tajam, nyelekit, ucapannya menyakitkan ; lanca = lancang, ceplas ceplos ;
palinggoman = gregetan, suka gemes ; mamiciak = mencubit ; patuyak = suka ngomong (bicara) keras ;
batandang = suka bertamu dan ngerumpi ; manobiang = ingin menangis, air mata tergenang ;
lapiak kumbuah = tikar anyaman dari kumbuah (sejenis tumbuhan air) ; kangkadang = ada kalanya ;
montun = begitu, seperti itu ; disinen = disana, menunjuk tempat yg jauh ; kughenah = tingkah laku ;
ontah ba’a lo teh = entah bagaimana pula ; manyolo = menyela, memotong pembicaraan seseorang ;
utak nyolang = otaknya terang (cemerlang), pintar ; utak kantang = otaknya seperti kentang, bodoh ;
utak gotah boku = otaknya seperti karet (rubber) yg dibekukan berbentuk bulat lonjong ;
ba-jelo2 = berkepanjangan, tak ada putusnya ; sidoga = iri hati, busuk hati ; cak inan = suka sekali, ingin
nan motiang = lantaran, yang menjadi penyebab ; kulaghi = nama sejenis ikan sungai khas talu ;
basighobok = bertemu (ber-hadap2an) ; palanta = bangku panjang, tempat duduk di warung kopi dll ; tontuan teh = mana tahu
Okt 8, 2011 | Galeri Fiksi, Galeri Rang Talu, Konten Terbaru
Oleh : Babe Derwan (Lihat Bagian 1)
TUJUAH TAHUN KEMUDIAN
Sebuah mobil jeep 2400 cc warna hitam model terakhir dari pabrikan Honda, baru sajo mamasuki Talu.Karano jalan oto itu santai — mungkin karano takuik kelewatan — sempat juo menarik perhatian satiok orang nan togak di topi jalan. Apolagi setelah kemudian oto rancak itu memasuki halaman sebuah rumah tuo, tapi terawat, yang talatak di pinggir jalan raya Talu. Etek Nurmi nan mahunyi rumah itu salamo ko, kontan mamhambua kalua manyambuik . Ndo tangguang sonang hati Tek Nurmi do. Tamu istimewa nampak ‘e. Sia lo lah nan tibo? Mungkin baitu pulo pikia urang nan mancoliak.
Kemudian dari pintu muko sebolah kida mobil kalua surang lelaki mudo gagah basarawa blue jean. Postur ‘e tinggi tegap, berambut pendek. Di ateh koniang batenggek lo kacomato hitam. Pokok ‘e — istilah rang kota — kren lah.
“Oiii… Bujang! Hampia lupo Etek,” teriak Etek Nurmi sambia menyalami jo mamaguik. Saking godang hati etek ro, sampai kalua aia mato ‘e.
Samantaro itu dari pintu belakang turun lo surang ibu sudah cukup bayo, yang diiringi pulo oleh surang cewek cantik berjilbab. Etek Nurmi segera pulo malumpek ka arah kaduo wanita itu. “Hei… Uni!” serunya sambia menyalami dan ‘cipika-cipiki’ dengan ibu yang dipanggilnya Uni ro. Kemudian beralih ke cewek cantik, tinggi langsing, yang sudah dari tadi menunggu sambutannya. “Hai… Ida! Apo koba? Samakin rancak jo anak gadih etek go,” teriak Etek Nurmi pulo, juo ndak lupo ‘cipika-cipiki’ (cium pipi kanan – cium pipi kiri).
Nan baru tibo itu memang Bujang jo Umak, sarato si Ida. Mereka baru sajo melakukan perjalanan panjang — 2 hari 2 malam lobiah — dari Jakarta. Iyo lah dareh na Bujang nampak ‘e kini. Coliak lah, oto ‘e ndok tangguang rancak ‘e lai. Mungkin urang Talu nan olun ponah kalua baru itu mancoliak ‘e. Sudah itu, pakai supir pribadi lo ro. Iyo jadi boss na Bujang nampak ‘e kini. Awak gagah lo tu. Apo karajo nyo di Jawa ? Baitu bisiak-bisiak tetangga mancoliak kedatangan Bujang.
Bujang memang ndok sio-sio merantau. Partamo tibo di Jakarta, Bujang terdampar di Tanjung Priok, daerah pelabuhan yang terkenal keras prilaku kehidupannya. Bujang bukan indok punyo famili di Jakarta ; layi nyo babarapo urang dunsanak sepupu dari Umak jo almarhun ayah ‘e, bahkan diantaronyo ado yang kayo rayo.Katiko Bujang nak barangkek, Umak ‘e layi nyo baposan, kalau ado apo-apo nanti, cari lah dunsanak. Dan Umak ‘e pun melengkapinya dengan alamat kasado famili di Jakarta ro.
Tapi indok. Bujang punyo pikiran lain . Wa’e indok omuah manggaduah dunsunak dulu. Bujang takuik, kalau-kalau kedatangan .e dianggap cuma akan jadi boban sajo. Filosofi urang Minang tontang marantau : “Kalau Buyuang poi marantau, sanak cari famili dicari, induak somang cari dahulu”, nampak ‘e botua-botua dipakai ‘e dek Bujang.
Bujang ka Tanjung Priok mulo ‘e mancari kawan samo godang di kampuang dulu. Namo ‘e si Rusdal. Lewat bantuan si Rusdal pulo lah Bujang partamo dapek karajo kasa dokek palabuhan, mambuek peralatan pemboran minyak di tongah lauik. “Untuak samantaro, bialah… sabagai batu loncatan… ” pikia Bujang. Tapi walau pun sebagai batu loncatan, Bujang tetap serius bakarajo. Bahkan Bujang ndok ponah manyio-nyiokan kesempatan untuak lembur. Namun baru 7 bulan, tibo-tibo Bujang harus baranti. Karano proyek lah salosai, indo layi nan dikarajokan lai.
Untuang lah Bujang pandai bahemaik. Pitih gaji wa’e indo bora nan tapakai do. Paliang untuak makan jo baiyua mambayia uang kost. Masih lumayan siso ‘e. Tiok hari Bujang mancari lowongan di koran, tapi ciek jo indo ado nan lalu do. Dengan siso pitih nan sobuak ro, Bujang lalu mancubo manggaleh kaki limo. Spesialisasi manjua kaos kaki jo kaos kutang yang modal ‘e memang ndok paralu banyak. Bujang mambuka lapak di terminal-terminal bis, kadang-kadang di emperan masjid satiok hari Jumat. Pasa sajoak — bontunlah kiro-kiro namo ‘e. Kalau kecek urang Jakarta, pasa kaget namo ‘e. Salosai urang Jum’at, salosai lo urang manggaleh. Alhamdulillah, berkat ketekunan ‘e, yang tadinya cuma bisa naik bis mambao barang dagangan, Bujang lah bisa lo mamboli Honda bekas untuak mempelancar usaho.
Tapi indok lo lamo do. Kemudian ado urang menawarkan usaho foto copy dakek sebuah kampus perguruan tinggi di Jakarta Selatan. Bujang hanyo diminta mamulangkan hargo 2 buah mesin foto copy, sedangkan tompek ‘e bisa dibayar bulanan. Usaho itu diover alih bukan karano merugi, tapi karano yang manjua ‘e nak pindah ka Jawa. Bujang pun tergiur. Karano manuruik urang yang manawarkan, untuang ‘e lumayan. Bujang tanpa pikia panjang lalu manjua motor Honda ‘e dan mangikih uang tabungan. Mako jadilah Bujang bantiang setir, bausaho foto copy. Sojak itu pulo Bujang indok parulu kost lagi, karano Bujang bisa sakalian tingga di tompek usaho foto copy itu.
Iyo kiro ‘e nyo. Usaho foto copy Bujang ndok tangguang rami ‘e do. Saking rami ‘e, Bujang tapaso manggaji urang untuak manolong. Dalam perkembangannya, bukan hanyo foto copy, tapi Bujang juo melengkapi dengan alat-alat tulis. Bahkan Bujang lah mambuka babarapo cabang lo di dokek-dokek kampus di Jakarta. Untuak mauruih ‘e, Bujang punyo beberapo urang kaparcayoan.
Nampak ‘e foto copy ko lah nan manjadi cikal bakal kejayaan Bujang. Seiriang dengan itu, — antah ba’a lo carito ‘e — Bujang lah manjadi pemasok ATK (alat tulis kantor) pulo ka kantua-kantua swasta maupun negeri. Omzetnya bukan puluhan , tapi sudah ratusan juta.
Samantaro usaho foto copy tetap jalan taruih, Bujang hanyo tinggal mengawasi sajo.
Dek maraso lah mampan, Bujang kemudian menyuruah Umak ‘e jo si Ida pindah ka Jakarta. Dek kabatulan pulo si Ida baru lulus dari SMU, jadi sakalian kuliah di Jakarta. Samantaro rumah jo sawah di kampuang minta tolong ke Etek Nurmi, adiak sepupu Umak untuak mahuni jo mauruih nyo. Dan sojak itulah, Bujang bakumpua baliak jo Umak sarato adiak di Jakarta. Mulo-mulo Bujang mangontrak rumah untuak mereka batigo. Tapi satahun kemudian Bujang mamboli rumah minimalis disebuah komplek perumahan di Jakarta Selatan.
Bujang nampak ‘e bukan tipe urang nan capek puas. Wa’e taruih bapikia ba’a caro ‘e mengembangkan ushaho. Mumpuang masih mudo, dan modal ado pulo. Sairiang dengan taruih bakambangnyo dunia telepon seluler, Bujang pun mengambil bagian jadi agen besar penjualan pulsa dari semua operator handphone. Bujang manjua ‘e sacaro grosiran. Dan tarnyato, keuntungannya sangaik godang. Bujang samakin kayo rayo.
Ndok cuma di Jakarta, Bujang juo buka cabang di Bandung dan Semarang. Jadi jan heran kalo bujang kini punyo karyawan hampia 80 urang. Dan dari sabanyak tu usaho Bujang, jadi agen pulsa adalah mesin uang sangat berarti bagi Bujang.
Mako jadilah Bujang rang kayo mudo. Apo nan Bujang indok punyo. Rumah rancak olah. Oto rancak olah. :Pitih talatak hampia di satiok bank. Malah si Ida lah dibalikan pulo dek Bujang oto kociak, Honda Jazz model terakhir, untuak kuliah. Apo jo lai?
Cuma ciek Bujang nan alun punyo; bini… Ikolah nan salamoko manjadi pemikiran, terutamo dek Umak Bujang.
Ba’a kok indok, umua Bujang lah dikapalo tigo. Lah patuik memang. Apolagi si Ida sabanta lai lah nak manyusul pulo. Di Jakarta, bukan ndok layi nan ndok maredeng-redeng ka Bujang, banyak nyo. Tapi olun ado nan cocok lai. Dan Umak Bujang pun lobiah ma’arokkan, kok dapek iyo urang kampuang jo lah. Kok indok na rang Talu, paliang tidok urang awak minang jo lah. Baitu pinto Umak Bujang.
Tapi keinginan Umak untuak mancari calon urang kampuang ditulak matah ‘e dek Bujang. Bukan karano Bujang indok ondak jo urang kampuang, tapi karano Bujang takuik kalau-kalau ado pulo anak mudo kampuang nan akan kecewa, sakik hati pulo, seperti nan dialaminyo dulu katiko Gadih nan sodang diincar tibo-tibo disemba ‘e dek urang Jakarta. Bujang lah marasokan ba’a podiah hati ‘e wakotu itu.Saking podiah ‘e, dan kalau bukan karano itu olun tontu Bujang lari ka rantau lai. Bujang indok omuah hal itu dirasokan pulo oleh anak mudo kampuang. “Bialah nan di kampuang itu untuak anak kampuang pulo,” kecek Bujang beralasan ka Umak ‘e. Idealis Bujang memang…
Mako jan dikiro, Bujang pulang kampuang untuak mancari bini. Bujang pulang salain taragak jo Talu, juo dek ado urusan bisnis. Bujang ingin berinvestasi di agrobisnis. Wa’e ingin mensurvey kebun kelapa sawit di Kinali yang ditawarkan oleh Mak Aciak. Rencana ‘e — kalau jadi — nanti Mak Aciak nan ka mauruih.
Sodangkan si Umak cuma bisa badoa-doa kociak, mudah-mudahan kapulangan mereka sakali ko bisa mambao hikmah ; ado jo lah anak gadih kampuang nan bisa membuek Bujang jatuah hati. Sahinggo bisa marubah prinsip Bujang nan indak ka manggaduah gadih kampuang.
Hari kaduo di Talu, Bujang malapehan taragak mandi ka Aia Angek. Dan katiko melinteh di muko rumah si Gadih, Bujang mancoliak surang padusi bakaruduang sodang manyapu di teras. Darah Bujang kontan bolosia. Ba’a kok indok; walau padusi ro manunduak manyapu, tapi mancoliak perawakan ‘e Bujang yakin itu adolah Gadih. Tapi bukan kah salamo ko Gadih di Jakarta jo suaminyo? Apo inyo sodang pulang kampuang lo? Bujang batanyo-tanyo dalam hati.
“Ehmmm… Ehmmm…” Bujang lalu sangajo pura-pura bataua.
Padusi nan manunduak manyapu ro kantan tasontak mangangkek kapalo. Mancoliak sia nan mandahem di topi labuah ro, iyo sabona tobang darah ‘e dek takojuik. Muko ‘e pucek pasi. Ingin raso ‘e wa’e lari dari teras itu, tapi ba’a lai — lalaki tinggi, kekar, dan gagah ro — lah togak lo dokek teras tu.
“Gadih… Apo koba?” sapo Bujang.
“Eh, Uda…Baiak…” jawek Gadih masih agak kaku dan berusaha malapehkan senyuman. “Bilo tibo, Da?” lanjuiknyo baso-basi, sambia manjawek tangan Bujang untuak basalaman.
“Lah duo hari. Kinin taragak lo nak mandi ka Aia Angek,” jawek Bujang. ” Gadih sendiri, sajak bilo di Talu? Ba’a koba suami?” Bujang baliak batanyo.
“Lah lamo,Da…” jawek Gadih pelan sambia manunduak, agak sodiah nada ‘e. Sodangkan pertanyaan tontang suami ‘e, seolah agak borek Gadih manjaweknyo.
Mulo ‘e Bujang agak takojuik. Tapi kemudian Bujang copek memaklumi bahwa ado sesuatu yang dipendam Gadih. Apo lo nan tajadi dengan paja go? Bukankah salamo ko wa’e di Jakarta jo suami ‘e. Sojak bilo jo pulang ‘e? Sajumlah tando tanyo kontan manumpuak dibonak Bujang. Seolah memahami perasaan wanita yang pernah mambuek hati ‘e nyanyuak , Bujang indok ingin batanyo lobiah dalam, apo lagi menyangkuik suami ‘e.
“Baitulah… Poi lah Uda dulu ka Aia Angek. Sampaian jo salam dulu ka Apak jo Umak. Nantilah Uda singgah ka rumah,” kecek Bujang mamocah kebekuan, sambia pamit.
“Iyo, Da… Singgah lah nanti ka rumah,” jawab Gadih singkek.
Sapanjang perjalanan ka Aia Angek , bahkan lah tibo lo di rumah, satumpuak tando tanyo tontang si Gadih masih bakacamuak di bonak Bujang. Apo nan lah tajadi dengan paja ro? Gadih seperti lah mengalami kegetiran. Badan ‘e nampak agak kuruih. Diponga’an lo dek suami e’? Disio-siokan? Kasihan Gadih… baitu Bujang mambatin.
Bujang lalu mancubo batanyo ke Etek Nurmi. Sobab pikia Bujang indo mungkin Etek Nurmi indo tahu apa nan lah dialami Gadih salamoko.
“Onde! Iyo ibo awak jo nasib si Gadih itu,” Etek Nurmi mamulai carito ‘e. Muko ‘e nampak serius. Bujang pun makin penasaran. “Tanyato awal ‘e Gadih indok amuah dijodohkan jo si Andri ro. Gadih ba’alasan bahsonyo wa’e olun nak balaki lai. Malah supayo alasan ‘e bisa dimaklumi, Gadih pun mangaku bahwa sabotu ‘e wa’e lah punyo lelaki pilihan. Tapi jo sia, Gadih marahasiokan. Wa’e indok omuah manyabuikan sia laki-laki nan lah jadi pilihan ‘e tu. Dek Gadih ndok omuah bataruih torang, rang gaek ‘ e manganggap Gadih cuma mancari-cari alasan sajo. Akhir ‘e sakoreh-koreh Gadih manulak, lobih koreh lo lai rang gaek ‘e tamasuak Mak Daruwih supayo Gadih manarimo lamaran dari Jakarta itu. “Ini demi kebahagian kau nanti, Gadih…” baitu kecek ayah jo umak ‘e bausaho mayakinkan Gadih.
“Etek indok tahu sia sabona ‘e lalaki pilihan nan dikecekan Gadih itu?” potong Bujang panasaran. Sobab satahu Bujang dulu Gadih olun layi nan punyo lai. Kok layi nan dokek jo Gadih dulu cuman wa’e. Tapi, baru sodang maredeng-redeng — olun sempat menembak gadih nan dimimpian ‘e siang malam ro — tau-tau lah dilamar urang.
“Itulah nan Etek nan ndok tahu,” jawek Etek Nurmi. Nan joleh, lanjuik Etek Nurmi, Gadih indok dapek ma-indok-an kondak hati urang gaek ‘e tu doh. Dan sojak Gadih manarimo lamaran itu, ontah apo sobab ‘e Gadih indok ponah nampak kalua rumah lai. Ontah konai pingit dek rang tuo ‘e, dan ontah Gadih sendiri nan maleh kalua rumah dek tapaso manarimo lamaran itu ; indok joleh na doh. Buliah dikecek-an batang hiduang ‘e baru nampak katiko lah barolek miang nyo, wakotu lah basandiang dengan suami ‘e di palaminan. Tigo hari setelah barolek, Gadih lah tobang lo dibaok suami ‘e ka Jakarta.
“Nah, memang di Jakarta Bujang indok ponah basuo jo Gadih?” tanyo Etek Nurmi tibo-tibo menyentakkan keseriusan Bujang mandongakan carito etek ‘e tu.
“Indok, Tek,” jawek Bujang singkek. Salamo di Jakarta, wa’e memang indok ponah mancari tahu tontang si Gadih. Untuak apo? Toh paja ro lah punyo laki. Apo jo nan ka-diarokan lai? Pikia Bujang waktu itu. Bujang cuma sekedar mandonga bahsonya di Jakarta Gadih tingga jo suami ‘e di daerah Bekasi. Hanyo itu. Kok layi acara-acara pertemuan perkumpulan urang Talu, Bujang pun ndok ponah mancaliak Gadih hadir.
“Tapi indok sampai duo tahun do di Jakarta,” Etek Nurmi malanjuikkan carito ‘e, “tibo-tibo Gadih dijopuik dek ayah ‘e pulang ka Talu, tanpa suami ‘e. Mulo ‘e ndok layi nan tahu doh apo nan lah tajadi terhadap Gadih. Lamo-lamo katahuan juo bahwa ruponyo Gadih minta carai dari suami ‘e. Tabotiak carito, sabolum nikah jo Gadih rupo ‘e si Andri ro lah punyo pacar di Jawa ro. Koba ‘e lah lamo mereka pacaran. Tapi dek paja ro indok urang awak, rang tuo Andri indo sa tuju. Kondak hati rang gaek ‘e, urang kampuang jo lah, makasuik ‘e bia ndok putuih hubungan ka kampuang. Akhir ‘e, ontah ba’a carito ‘e, jadilah jo si Gadih. Cilako ‘e, si Andri ro indok lo manulak do. Manuruik jo — jo kondak hati rang tuo ‘e — sekalipun wa’e lah punyo pacar di Jakarta. Akhir ‘e, si Gadih nan jadi korban…”
“Jadi korban ba’a ko, Tek?” potong Bujang samakin penasaran dengan carito Etek Nurmi.
“Ba’a kok indok pulo yo; baru ka balayia biduak rumah tangga ro, lah dioyak ‘e dek badai. Si Andri basilingkuh jo pacar ‘e ro baliak. Donga ‘e jarang pulang. Lobiah ocok di rumah silingkuhan ‘e tulai. Nan manyakik an, balakangan diketahui si Andri lah punyo anak jo salingkuhan ‘e ro. Sabolun malahiakan. rupo ‘e mereka lah manikah siri, tanpa diketahui rang gaek si Andri. Mako jadilah Andri babini duo. Walaupun Gadih nan jadi bini tuo, tapi nampak ‘e Andri lobiah memperhatikan nan mudo. Mako jan heran kalau Gadih acok ditingga an surang di rumah,” ciloteh Etek Nurmi.
“Tu ba’a miang nyo rang gaek si Andri. Dipadiya-an ‘e jo nyo anak ‘e takah itu?” tanyo Bujang yang dari tadi membantin ; ‘kasihan si Gadih…’
“Layi diberangangan dek rang tuo ‘e nyo. Tapi jawaban anak ro malah samikin mambuek podiah hati si Gadih. Cubo bayangkan ;’…..kan Andri dulu sudah bilang bahwa Andri nggak mau kawin sama orang kampung… Karena Andri sudah punya pacar… Sudah punya pilihan sendiri… Tapi karena Mama nggak suka sama pacar Andri itu, Mama paksa juga kawin di kampung dengan pilihan Mama …Padahal Andri sudah bilang, Andri nggak tertarik, apalagi cinta sama si Gadih. Akhirnya begini jadinya…. Siapa yang salah??? Mama kan!!! Karena Mama memaksakan perkawinan instan itu… Sekarang terserah apa maunya???…. Itulah kecek Andri ka rang gaek ‘e. Ba’a ndok kok podiah hati Gadih nan turuik mandonga-an ‘e. Luko! Bak di-iriah-iriah sambilu,” Etek Nurmi seolah mendramatisir.
Akhir ‘e, lanjuik carito Etek Nurmi, dek ndok tahan lai diperlakukan seperti itu, Gadih minta dicoraikan oleh Andri. Gadih lalu mangoba-an ka rang tuo ‘e di kampuang bahwa wa’e lah bacorai. Mandonga koba buruak ro, ayah Gadih lansuang barangkek ka Jakarta manjopuik anak ‘e nan lah disio-siokan itu. Kinin mereka baru manyosa karano lah mamaso Gadih kawin jo Andri, anak urang rantau ro.
“Sojak itulah Gadih tingga di kampuang. Tapi, ontah karano malu dek musibah itu, Gadih jarang kalua rumah. Kok ka layi paliang sampai langkan miang nyo. Untuang ‘e, si Gadih olun sempat punyo anak dari perkawinan ‘e ro. Jadi, ndo lai na boban nan ka ditangguang Gadih,” kecek Etek mangkhiri carito ‘e.
******
” KASIHAN Gadih…” Lagi-lagi Bujang membatin. Ikolah akibat perkawinan yang dipasokan. Perkawinan instan nan awalnyo tanpa dilandasi rasa cinta. Hanya karano tapaso mengikuti kondak hati orang tuo. Akhir ‘e anak yang jadi korban. “Ah… seandanya sajo dulu…” bisiak Bujang berandai-andai dalam hati, tapi Bujang merasa percuma meneruskan andai-andainya itu. Semua sudah berlalu… Untuk apo jo lai?
Bisuak siang ‘e, sasuai dengan janji kapotang, Bujang poi batandang ka rumah Gadih. Supayo jan kaku, untuk mencairkan suasana Bujang minta dikawani Etek Nurmi jo si Ida, adiak ‘e. Kedatangan mereka pun disambuik angek, baiak oleh ayah maupun umak Gadih. Cuma Gadih nampak agak sekatek kikuk. Malu-malu sungkan. Padohal dulu satahu Bujang Gadih orangnya luwes dan lincah. Ontah apo pulo nan bakacamuak dalam hati Gadih, sahinggo sikap ‘e takah itu. Ontahlah… Hanyo Gadih nan tau.
Mulo-mulo mereka duduak basamo di ruang tamu. Tapi lamo-lamo — ontah diatur ontah tidok — mahilang surang-surang ka balakang. Etek Nurmi jo si Ida maikuik-an umak Gadih nan baranjak ka meja dapua. Sodangkan ayah ‘e poi lo kamuko dengan alasan mamboli rokok. Mako tinggalah baduo Bujang jo Gadih di ruang tamu ro. Tapi samo-samo mambisu. Gadih cuma menunduk. Bujang seolah sodang merangkai kato dalam hati, tapi olun juo takatokan.
“Gadih…, Uda minta maaf atas pertanyaan Uda tontang suami Gadih kapotang,” tibo-tibo Bujang mamocah kebisuan. Gadih pun kontan mangangkek kapalo. “Taruih torang salamo ko Uda indok tahu kalau Gadih olah bapisah, ” lanjuik Bujang.
” Ah ndok ba’a do, Da. Kenyataan ‘e memang baitu,” jawek Gadih sendu sambia manunduak baliak. Seperti ado nada kepahitan di situ.
Bujang pun maraso manyosa karano lah mambangkik-an masa lalu Gadih nan begitu getir. Gadih seperti tahompeh ka jurang yang paliang dalam, sahinggo sulit bagi wa’e untuak bangkik. Barangkali itulah nan mambuek Gadih tidak periang dan seluwes yang dulu, dan lobiah suko mengurung diri di rumah. Mako jan heran kalo wajah Gadih makin putiah barosiah karano ndok ponah konai matahari. Badan ‘e pun samakin langsiang. Sekaligus mambuek Gadih semakin cantik dan mamikat. Setidak ‘e di mato Bujang sendiri. Bujang samakin jatuah ibo mancoliak Gadiah. Ingin rasonyo Bujang ma-angkek Gadih dari jurang nan dalam itu, lalu maubek luko-luko nan ado di hati ‘e.
“Gadih….,” panggia Bujang setelah mereka lamo mambungkam. Gadih pun ma-angkek kapalo ‘e. “Amuah ndok ikuik Uda ka Jakarta?” lanjuik Bujang pelan.
Walau pelan, tapi kato-kato itu mambuek Gadih sontak takajuik. Bagai mandonga potuih tongga di siang bolong. “Makasuik Uda?” tanyo Gadih pendek.
“Kito manikah, lalu tingga di Jakarta,” jawab Bujang singkek, tapi padek.
Gadih bukan lagi bagai mandonga potuih tongga, tapi ulu hati ‘e seolah konai busur panah yang amat tajam hingga mengalepa-galepa. Gadih indok tahu bagaimana harus manjawek ‘e.
“Awak lah jando, Da. Olah bokeh urang. Apo jo nan ka Uda parambiak lai?” kecek Gadih kamudian.
” Indok buliah takah itu Gadih. Bagi Uda ndok ado masalah apokah Gadih jando atau bukan.Taruih torang, sojak dulu Uda lah konai hati jo Gadih. Tapi olun sempat takatokan lai, tibo-tibo Gadih olah dilamar urang. Katiko itu kok layi anak mudo nan paliang kacewa mandonga lamaran itu, adolah Uda. Iyo sabona terpukul Uda dibuek-an ‘e. Tapi kadiponga-an lai. Dan itu pulo lah akhir ‘e nan mambuek Uda poi marantau — maningga-an Talu — untuak maubek hati nan kecewa. Tapi kinin, walau waktu olah berlalu, hari berganti minggu, minggu baganti bulan, dan bulan baganti hinggo kini lah hampia tujuah tahun, perasaan Uda ka Gadih olun ponah barubah lai. Kalau dulu cinto Uda indok bisa memiliki karano Gadih lah lobiah dulu di suntiang urang, tapi kini dek Gadih olah lopeh baliak, raso ‘e indok layi salah ‘e kalau cinto Uda itu juo ingin memiliki. Kalau dulu kasiah Uda tak sampai, Kini lah baru ta sampai-an,” kecek Bujang makin serius.
Gadih makin tertunduk. Bisu. Malah matonyo yang berlinang. Sabolun aia mato ro jatuah copek-copek diusap ‘e. Indok joleh apokah itu aia mato kesedihan, apokah aia mato kebahagian mandonga kato-kato Bujang, ataukah aia mato peneyesalan? Hanyo Gadih nan tahu.
“Kalau kato-kato Uda tadi indok berkenan dek Gadih, Uda minta maaf. Tapi kalau Gadih ndok bisa manjawab kini, Uda basaba manunggu,” kecek Bujang lagi.
“Taruih torang, Da, sabona ‘e tujuah tahun nan lalu kato-kato Uda tadi itu sangat awak tunggu-tunggu. Kalau sajo Uda maungkapkan ‘e wakotu itu mungkin carito ‘e jadi lain. Sobab awak punyo alasan untuak manulak lamaran urang lain. Tapi awak tunggu-tunggu, Uda honiang jo. Awak pun jadi ragu, ba’a nan sobona e Uda ka awak. Itulah, akhir ‘e ndok layi alasan diawak manulak permintaan ayah jo umak untuak marimo lamaran urang ro,” akhir ‘e Gadih buka suaro.
Astaga! Jadi Gadih dulu juo marasokan apo nan Bujang rasokan? Ah, memang gue ini laki-laki pengecut. Bisiak Bujang manyosa dalam hati dengan logat Jakarta sambia garuik kapalo. Cubo kalau dulu wa’e berani mangungkapkan perasaan ‘e, tontu Bujang indok batopuak sabolah tangan.
“Maaf kan Uda, Gadih. Memang wakotu itu Uda laki-laki pangacuik. Tapi kalau boliah tahu, koba ‘e dulu Gadih sempat mangaku ka ayah jo umak lah punyo lelaki pilihan. Siapo urang ‘e, Gadih?” tanyo Bujang masih penasaran dengan carito Etek Nurmi kemaren.
“Maaf, Da. Sabona ‘e Uda ndok paralu batanyo lai. Kan tadi olah awak kecek-an bahwa dulu sabolum di lamar awak sangat manunggu-nunggu kato dari Uda. Tapi Uda ndok jo kunjuang datang. Malah terakhir awak donga Uda lah mahilang ka rantau,” jawek Gadih, seperti satongah manyindia atau satongah mamojokkan.
Tasindia atau indok, tapojok atau bukan, nan joleh kato-kato Gadih itu botua-botua mambuek wa’e sadar bahwa wa’e bukan cuma lelaki pangacuik, tapi juo konyol, bodoh, karano terlalu dibao perasaan wakotu itu.
“Maafkan Uda, Gadih. Uda memang lalaki yang bodoh katiko itu. Bukan memperjuangkan cinto Uda ka Gadih, tapi malah memilih kabur begitu mandonga Gadih dilamar urang. Kalah sabolum batandiang,” kecek Bujang manyosa-i..
Lalu diam. Gadih juo diam. Samo-samo tatunduak. Hanyo hati masiang-masiang nan bakato. Ontah mangatokan apo.
“Tapi Gadih,” Bujang kembali buka kato, ” bak kecek urang barat, lets be gone be by gone, yang berlalu bialah jadi masa lalu. Kini kito buka lembaran baru. Sakalipun kini Gadih lah jadi jando, nan pasti perasaan Uda ka Gadih sampai kini olun barubah. Mudah-mudahan baitu jo lah andak e Gadih. Sungguah! Uda serius! Kalau omuah poi jo Uda, mumpung masih di kampuang, Uda akan segara melamar Gadih. Dan sacopek ‘e Uda akan manyuruah keluarga Uda datang ka kaluarga Gadih,” lanjuik Bujang, lansuang manembak Gadih. Seolah ndok ondok mambuang waktu lagi. Beko kalah copek lo baliak bontuak dulu, Gadih keburu dilamar urang.
Mandonga kato-kato Bujang itu Gadih makin tatunduak. Aia mato ‘e kembali balinang. Kemudian meleleh mambasahi pipi nan lombuik dan halus itu. Olun joleh apokah itu aia mato kebahagiaan.
“Kalau Gadih olun bisa menjawab kini, ndok ba’a doh. Uda saba manunggu.” kecek Bujang lagi, tapi sabotua ‘e satongah mandosak bia Gadih langsuang mambari jawaban pasti.
Gadih lalu pelan mangangkek kapalo sambia manyeka aia mato. Tapi mancoliak Gadih manangih Bujang pun langsung bakato ; “Uda berharap, mudah-mudahan aia mato Gadih itu aia mato kebahagiaan.”
Gadih kemudian mangangguak pelan. “InsyaAllah, Da… Mudah-mudahan Uda juo bahagia,” jawek Gadih pelan.
“Alhamdulillah… Jadi Gadih manarimo lamaran Uda?” sambuik Bujang ndok tangguang sonang hati ‘e do.
Gadih kembali ma-angguak pasti. “Asal nanti Uda ndok ka manyosa kawin dengan jando… Dan janji indok akan mambuek awak mangalami nasib yang samo seperti dulu,” kecek Gadih seolah meminta ikrar dari Bujang.
“Astaga! Picayolah, Diak! Hidup berdampingan dengan Gadih, adolah angan-angan Uda dari dulu. Tontu ndok kamungkin Uda akan manyio-nyiokan ‘e do. Uda janji!” jawek Bujang dengan pasti.
Singkek carito ; gayuang basambuik. Kedatangan keluarga Bujang duo hari kemudian untuak melamar Gadih secara resmi disambuik baiak dek keluarga Gadih. Lah dapek lo etongan, lah bulek lo aia kampambuluah ; kaduo bolah pihak sepakat bahwa antaro Bujang jo Gadih cukuik nikah jo di kampuang. Nanti di Jakarta baru pesta. Rencana ‘e Bujang ka baralek godang di Jakarta. Dan untuak keperluan nikah ro, Bujang tapaso memperjang wakotu ‘e di Talu.
Soal prinsip nan indok kamancari bini di kampuang, nampak ‘e Bujang indok paduli lai. Buliah jadi prinsip Bujang itu lah luntur berkat doa Umak ‘e yang mengharapkan Bujang dapek bini di kampuang. Ternyato prinsip Bujang kalah kuaik dibandiang doa Umak ‘e.
Jadi, kalau tujuah tahun nan lalu Bujang maninggakan kampuang mambao hati luko karano Gadih diambiak urang, kinin Bujang maninggakan Talu penuh dengan kebahagiaan karano Gadih lah dapek lo disuntiang ‘e, meskipun Gadih kini lah jadi jando. Jando bukan sumbarang jando. Tapi jando nan mambuek anak mudo tagilo-gilo. SELAMAT BERBAHAGIA LAH BUJANG JO GADIH.** S – e – k – i – a – n *** ( Cerita ini adalah fiksi/khayalan semata. Bila ada yang merasa mengalami dan tokohnya pun sama dalam cerita ini, itu hanyalah faktor kebetulan semata).
Jul 31, 2011 | Galeri Fiksi, Galeri Rang Talu, Konten Terbaru, Seni Budaya
Oleh : Babe Derwan
LAH hampia saminggu, Bujang paniang-paniang lalek. Muko ‘ e nampak balipek-lipek. Sombok… Bagai menyimpan sesuatu. Antara kesal dan sodiah. Antah dendam bercampur bonci. Indak tantu, antah apo nan kadikarajokan Bujang. Duduak salah, togak salah. Dari pagi sampai potang, di rumah karajo Bujang hilia mudiak. Dari muko ka balakang. Dari balakang duduak sabonta dimuko TV di ruangan tongah, ndak lamo kemudian lah bamonuang lo di langkan. Sementara rokok di mulut Bujang ndak beranti barabun, bak sepur. Biasonyo sabungkuih sahari indak habih, tapi kini 2 bungkuih rokok sahari ndak cukuik dek Bujang.
Sabotua ‘e Bujang adaloh anak mudo nan panuah samangat. Energik. Biaso ‘e, habis Subuh Bujang langsuang mangganti saruang jo sarawa pendek, kemudian lokek lo sapatu olah raga putiah. Bujang lalu kalua rumah, balari-lari kociak — marathon namo ‘e yo — manambuih embun pagi yang masih toba.
Mulai dari Pasa Usang, sampai ka kuburan Jalan Bangkok. baputa ka sekolah Tembok, taruih kalua di Pasa Teleng sampai lo baliak di Pasa Usang. Paliang tidak satiok pagi 2 kali rute itu diputari dek Bujang. Lah kalaua poluah, baru Bujang naiak ka rumah untuak menyeruput teh manis jo obuih ubi batabua karambia, nan alah disadiokan dek Umak Bujang. Satolah itu — kalo ndo maleh — kankadang Bujang poi lo mandi ka Aia Angek sambia marocak honda butut ‘e, bebek Astrea tahu 80an. Pulang mandi,Bujang kadang-kadang singgah lo di pasa manyantap bubua samba si Er yang memang terkenal mantap.
Tibo di rumah mato hari lah sapanggalah.Bujang biasonyo lah kosik pulo di belakang rumah ma agiah makan ayam sakandang godang. Dek ndok tangguang banyak ayam Bujang, tiok pokan Ruba’a, hampia sakaranjang hasil talua ayam Bujang nan dijuakan Umak ‘e ka pasa. Pitih ‘e lopeh lo untuak balanjo hari Ruba’a dek Umak Bujang.
Salosai maagiah makan ayam, Bujang lah menyebarkan makanan ikan omeh bacampua nila lo di tobek berukuran sodang, yang masih talatak di belakang rumah. Di pamatang tobek, Bujang basisolek lo dengan batanam kacang panjang jo toruang tunjuak. Di sabolah kanan tobek, lai lo tanah salaweh sapiriang sawah nan dimanfaatkan Bujang untuak batanam coklat. Walaupun cuma sekitar 20an batang, tapi kalau dilungguak-lungguakan ‘e dek Bujang, lumayan jo. Di sela-sela pohon coklat, ditanam ‘e pulo dek Bujang dengan lado. Pokok ‘e, buliah dikecekan indok lai tanah nan taluang dibuek si Bujang. Sakuliliang rumah ‘e ponuah dengan tanaman. Bahkan lai gai tomat jo sayua bayam.
Apo nan dikarajokan Bujang ko andak ‘e buliah manjadi contoh dek urang kampuang. Karano sacaro ndak lansuang Bujang lah mampratekkan ketahanan ekonomi mandiri sacaro kecil-kecilan bagi rumah tangga Umak ‘e. Ba’a kok tidok; kok nak pongek lauak, Bujang tingga manangguak di tobek. Kacang panjang tingga maambiak. Kok nak kalio ayam, tingga manangkok ayam di kandang. Lado jo tomat layi lo di halaman.Karambia tingga dipanjek.
Beko, kiro-kiro pukua sambilan lewat, Bujang lah tibo lo di sawah. Mancoliak padi ‘e nan mahijau, baru salosai basiang. Dek baru habih basiang kaduo kali, tontu Bujang tingga manunggu manyabik jo lai. Sawah paninggalan almarhum ayah Bujang memang ndok terlalu laweh, kiro-kiro bangkitan 40 kombuik.Tapi untuak hiduik batigo; Bujang, Umak jo si Ida — adiak ‘e, alhamdulillah mereka indok ponah maraso kakurangan.
Sairiang dengan tamatnya Bujang dari SMU di Taluak Ambun duo tahun lalu, ayah Bujang mandadak maningga akibat serangan jantuang. Lobiah dari itu Bujang juo gagal waktu mengikuti tes masuak Peguruan Tinggi Negeri di Padang. Demi menjago Umak jo adiak bungsu ‘e, Ida, Bujang lalu memutuskan untuk manotap sajo di kampuang. Bialah… basawah miang lah di kampuang, pikia Bujang mantap wakotu itu.”Bialah nanti si Ida jo nan kuliah. Uda nan manjago Umak sambia mancarian biaya kuliahnyo di kampuang,” kecek Bujang mambori alasan ka Umak ‘e.
Sajak itulah Bujang kosik basawah, bataranak ayam, jo batobek.
*****
TAPI, lah saminggu ko Bujang botua-botua kahilangan samangaik. Jan kan kakarajo, mandi gai Bujang lah maleh. Sawah ndok ponah lah dicoliak ‘e. Ma- agiah makan ayam jo ikan, tapaso Umak Bujang nan turun tangan. Si Ida — nan baru kelas I SMU Taluak Ambun — sesudah pulang sekolah baru bisa manolong.
Sikap Bujang mandadak barubah, gara-gara saminggu nan lalu Bujang mandapek koba yang mengejutkan dari Umak ‘e. Bahwa, si Gadih lah dilamar pulo dek urang rantau. Kato Umak Bujang, nan malamar si Gadih adolah kamanakan dari Pak Daruwih. “Urang gaek paja tu lah lamo tingga di Jawa. Lah lamo lo ndak pernah pulang. Dengan alasan bia nanti acok pulang, mereka mancari minantu urang kampuang. Antah bilo jo etongan ‘e, tibo-tibo lah bajadi jo — jo si Gadih,” carito Umak si Bujang.
Darah Bujang kontan balosia. Muko ‘e pun sirah. Barito ko bagi Bujang botua-botua bak mandonga potuih di siang bolong. Ba’a kok tidok; si Gadih, tetangga nan cuma bajarak sambilan rumah dari rumah Bujang, tiok hari manjadi pamainan mato dek Bujang, tibo-tibo ka disuntiang ‘e dek urang.
Gadih memang gadih manih. Muko putiah halus bak pualam. Hiduang satangah mancuang. Proposi dengan wajahnyo yang oval. Dagu runciang bak sarang lobah. Kalau mangecek lamah lombuik, halauih bahasonyo. Dan kalau sonyum — alamak — Bujang bisa pingsan mancaliak ‘e. Cubo bayangkan; hampia satiok hari gadih rancak tu bamain-main di muko puncak hiduang Bujang, siang jo malam manjadi angan-angan Bujang, dan lah lamo pulo ba’agak-agak nak manyampaikan makasuik hati nan ndak takatokan, tibo-tibo kini gadih impiannyo itu lah disemba ‘e dek urang. Ba’a ndok ka shock Bujang dibueknyo.
Gadih sanasib jo si Bujang. Tamaik SMU Negeri Talu satahun nan lalu, karano masalah ekonomi Gadih tapaso menunda keinginan untuak kuliah di Padang. Untuak mancari kesibukan, Gadih mahonor di Kantua Camaik, sambia manolong rang gaeknyo balopau kociak di muko rumah.
Antaro Bujang jo Gadih memang olun ado hubungan apo-apo. Bagi Bujang baru sabateh angan-angan. Tapi Bujang memang lah lamo mancubo melakukan pendekatan. Misal ‘e bilo ado kegiatan karang taruna di kampuang, atau kegiatan-kegiatan anak mudo lainnya, Bujang jo Gadih biasonyo selalu terlibat. Karanonyo, tontu mereka acok basuo. Dan kesempatan itu tontu ndok lo disio-sio- an ‘e dek Bujang. Wa’e berusaho mandokekkan diri, berusaho mencari dan memberikan simpati kepado Gadih. Kankadang kalau nak pai rapek ka gedung atau ka kantua camaik, Bujang sangajo manjapuik Gadih dulu. Dan Gadih pun nampak ‘e tak menolak. Sepertinya happy-happy sajo dijapuik Bujang.
Bilo lah cando tun ; ooo…waik, ndok tangguang sonang hati Bujang doh. Bahkan bukan main bangga ‘e. Ba’alah kok indok; bajalan badampingan dengan gadih impian, sia pulo lah hatinyo nan ndok kabungo-bungo. Dek saking sonang ‘e hati Bujang, ndok tontu apo nan kadikecekkan ‘e lai. Bujang seperti kehilangan kato-kato. Atau mungkin juo karano Bujang jadi grogi. Tapi untuanglah si Gadih kadang-kadang pandai mencairkan suasana dengan batanyo ini dan itu.
Dalam rapek ndak sekejap pun Gadih lapeh dari Bujang. Dima Gadih duduak, di sampiangnyo pasti ado Bujang. Dima Gadih togak, di situ pulo Bujang togak. Pokok ‘e Bujang taruih mamempet. Beko ka pulang, Bujang lah manggandeng lo, sampai ka jonjang rumah paja ro. Samantaro Gadih nampaknyo sonang-sonang sajo. Indak maraso keberatan, apolagi maraso rikuh dianta Bujang pulang. Malah Gadih batarimo kasih ka Bujang, sambia melempaskan senyumannya yang membuek hati Bujang manggalepa.
Bagi Bujang, bukankah sikap Gadih ini seolah memberi harapan? Harapan yang belum sempat terungkapkan. Harapan yang masih terpendam… Ontah sampai kapan…
“Koba ‘e ndo lamo doh. Habih hari Rayo Haji go mereka nikah. Salasai barolek, Gadih dibaok ‘e lai dek suami ‘e ka Jakarta,” Umak Bujang kembali menyentakkan Bujang dari lamunannya. Kecek Umak ‘e tu seolah manggaloga di taliongo Bujang. “Habis Rayo Haji, bararti ndok sampai duo bulan lagi si Gadih lah dibao tobang dek urang,” rintiah Bujang dalam hati. Podiah memang. Ahhh…plak!!! Reflek Bujang manyipak bungkuih rokok ‘e nan jatuah dari meja, sambia berlalu maninggakan Umak ‘e yang sontak takojuik sambia mauruik dado.
Sojak itulah hati Bujang ndo bakatontuan lai. Saraso bak dilunyah-lunyah. Romuak… Bujang kadang maraso manyosa, maraso laki-laki pangacuik. Ba’a kok untuak mangatokan kato cinto sajo ka Gadih, Bujang ndok barani. Kanapo? Ah… ingin rasonyo Bujang kini memberanikan diri menemui si Gadih, untuak menumpahkan semua perasaannyo. Tapi kinin untuak apo? Semuanya sudah talambek. Pikiran Bujang bakacamuak.
NAMUN KEMUDIAN DALAM HATI BUJANG MUNCUL SUATU PROTES. WA’E MARASO BAHWA SELAMA INI URANG RANTAU SUDAH MEMBERIKAN PERASAAN KETIDAK ADILAN BAGI ANAK-ANAK MUDO DI KAMPUANG. CUBO BAYANGKAN, SATIOK LAI ANAK GADIH NAN TACELAK DI KAMPUANG, TIBO-TIBO DATANG RANG RANTAU MANYEMBA ‘E. PADOHAL BAGI ANAK KAMPUANG KAGANTI BUNGO DI HALAMAN, SAKALIGUS PAMANIH KAMPUANG, NAN SATIOK HARI DIUPUAK-UPUAK DIBAWAH PALUPUAK MATO. PODIAH ‘E, KADANG-KADANG ADO NAN LAH SADANG BAPACARAN, ADO PULO NAN LAH BAJANJI SAHIDUIK SAMATI, TAPI DEK TERGODA JO LAMARAN URANG RANTAU YANG EKONOMINYA MUNGKIN LOBIAH MENJANJIKAN, JO MEMBAYANGKAN LOMAKNYO HIDUIK DI KOTA NANTI, MAKO JADILAH ANAK KAMPUANG MALAPEH HAWO. DAN JANJI PUN TINGGA JANJI. KARANO ANAK GADIH ‘E , BAITU JUO RANG GAEKNYO, LOBIAH MAMILIAH URANG RANTAU YANG DIANGGAP LOBIAH MAPAN.
APOKAH DI RANTAU — DI KOTA-KOTA BESAR — SEPERTI JAKARTA, BANDUNG, MEDAN DAN LAIN-LAINNYO, SUDAH KRISIS WANITA? INDOK ADO LAI ANAK GADIH NAN TACELAK? ATAU MUNGKIN INDOK LAKU DI KOTA? SAHINGGO HARUS PULANG KAMPUANG MANCARI ‘E? HAAA…? INI SEBUAH FENOMANA. TAPI FENOMENAL YANG SAKIT. BEGITU PROTES BUJANG DALAM HATI.
Sebagai anak kampuang Bujang maraso diremehkan. Diperlakukan sakondak hati urang rantau. Itu karano Bujang maraso turut jadi korban. Ontah korban nan kabora, Bujang ndok tahu pasti.Sapangatahuan Bujang lah banyak anak mudo kampuang nan tacopuang. Kasus yang masih angek dialami si Podan, kawan Bujang sendiri.
Podan tapaso pasrah, katiko si Elli, nan baru 6 bulan dipacari ‘e, mangaku ndok bisa manolak keinginan orang tuonyo untuak mangawinan wa’e dengan Rudi, anak urang rantau dari Jakarta. Si Podan sabona nyanyuak dibuekan ‘e. Untuang sajo indok sampai bakujuik.
Sabolum ‘e, kasus yang hampia sanasib dengan Bujang dialami pulo dek si Uyun. Baru sadang maredeng-redeng ka si Ita nan hitam manih, eh, ndok tahu, kiro ‘e urang tuo si Ita lah manirimo pulo lamaran anak urang rantau di Bandung. Lah malopeh hawo pulo kawan tu.
*****
ONTAH apo nan tibo-tibo dipikiakan Bujang, mandadak wa’e maajak Umak jo si Ida bagonjua. Umak jo Ida agak taheran-heran. Sobab Bujang nampak ‘e serius sakali.
“Mak, lah bosan lo Ujang di kampuang go. Kok Ujang cubo lo marantau ka Jakarta ba’a nyo, Mak. Sakalian mancubo marubah nasib. Untuang-untuang berhasil,” Bujang mambuka kato.
Umak jo si bungsu Ida kontan takojuik. “Aaa…sajak bilo lo takona dek Bujang nak marantau!?” tanyo Umak ‘e masih taheran-heran.
“Sabotu ‘e lah lamo tapikia dek Ujang. Tapi baru kini takecekan ka Umak,” jawab Bujang.
“Ida tau. Uda tibo-tibo nak marantau gara-gara Uni Gadih dilamar urang kan?” sela adiak e sambia malirik ka Umak.
Dan Umak pun mangangguak tando satuju.
Maraso kanai tembak dek adik ‘e, muko Bujang sirah jo sobuak. “Itu indok ado gai tu, Diak. Uda ndok ado hubungan apo-apo dengan si Gadih. Masih sebatas teman. Sungguah… rencana ko lah lamo Uda pikia kan,” jawek Bujang ma-ilak.
“Kalau Ujang pai, sia lai ka manjago Umak jo adiak ang? Dan ba’a lo sawah awak?” tanyo Umak Bujang gusar.
“Mukasuik Ujang, bialah dicubo dulu. Doa an sajolah anando sukses. Kalau lah sukses Ujang di rantau nanti, Umak jo Ida buliah manyusul. Sudah tu tingga miang awak di rantau lai,” kecek Bujang satangah mambujuak dan meyakinkan. Sadangkan mangonai dengan sia Umak jo adiak ‘e ka tingga, kato Bujang, wa’e akan mangecek jo Mak Aciak (adiak Umak ‘e yang paliang kociak) untuak manjago Umak jo si Ida. Ado pun tontang sawah, kato Bujang, ndok sobek na lai. Tingga manunggu manyabik miang lai. Tingga karajo ringan. “Kalau untuak manyabik jo nyo, bisa Umak upahan nanti,” kecek Bujang.
Umak jo si Ida tadiam madonga – an alasan si Bujang. Mereka marasokan Bujang nampak ‘e sabona lah pokek na hati ‘e nak marantau. Kalau indok sarius tontu Bujang ndok pulo ka maajak Umak jo adiak bagonjua bona tontang niaik ‘e itu. Umak Bujang sabotu ‘e bisa memahami keinginan anak ‘e itu. Apolagi kawan-kawan sapantaran Bujang lah banyak nan maninggakan kampuang. Bialah nak dicubo ‘e pulo. Siapo tahu nasibnya bisa berobah nanti. Baitu pikia Umak Bujang. Karano Bujang anak yang rajin, cekatan dan pandai bergaul, mako Umak Bujang indok lo terlalu khawatir akan nasib Bujang di rantau nanti.
Singkek carito, dengan satongah borek hati Umak jo Ida malopeh juo Bujang ka rantau. Bujang sangajo barangkek sabalum acara si Gadih baralek. Dari pado indok kuaik manahan ibo hati manyaksikan ba’a nanti Gadih basandiang jo urang, bialah jan sato mancaliak. Baitu pikia Bujang. Bialah inyo bao tobang hati ‘e yang romuak itu ka rantau. Mudah-mudahan sado kapodihan hati Bujang copek terobati dengan kesibukannya mengadu nasib di rantau.
Dan Bujang pun barangkek sacaro diam-diam. Wa’e ndok ingin urang banyak tahu tontang kapaoian ‘e.Kalau pun ada nan manampak Bujang barangkek, wa’e cuma mangaku poi ka Padang sabonta. Bialah waktu jo nan manjawab nanti, katonyo dalam hati.
Sojak tabotiak barito bahwa Gadih lah di lamar urang rantau, Bujang memang indok pernah manampak ‘e lai, apolagi basuo. Gadih jarang kalua rumah. Seolah ditelan bumi. Bujang juo ndak tahu kanapo. Ontahlah… Koma pai ‘e paja tu. Dan katiko nak naiak oto di muko rumah ‘e kabarangkek, Bujang menyempatkan melayangkan pandangannyo ka rumah Gadih. Tapi paja du ndo jo nampak doh.
Semoga bahagia kau Gadih… Salamaik tingga kampuang…. Bisiak Bujang dalam hati katiko oto nan ditumpangi ‘e itu mulai tobang maninggakan Talu. Tobang mambao hati Bujang nan ta ibo.*** … bersambung ke bagian 2.
(Cerita ini adalah fiksi/khayalan semata. Bila ada yang merasa mengalami dan tokohnya pun sama dalam cerita ini, itu hanyalah faktor kebetulan semata)
